Ótip baratırǵan jıl Qaraqalpaqstan ushın shın mánisinde bereketli jıl boldı desek aljaspaǵan bolamız. Sebebi, bul qısqa waqıt ishinde húrmetli Prezidentimizdiń basshılıǵında aldın turmısqa engizilgen hújjetler qatarında bir qatar párman hám qararlar qabıl etildi. Bunıń nátiyjesinde regionımız ushın berilgen jeńillikler sanı ele de arttı. Bunnan tısqarı, respublikamız turmısında kóplegen tariyxıy waqıyalar júz berdi.

Mine usınday ámelge asırılǵan iygilikli jumıslar qatarında Jańa jıl bayramı qarsańında búgin Nókis qalası aymaǵında sanaatımızdı rawajlandırıwda hám ekonomikamızdı bekkemlewde áhmiyetli orın tutatuǵın «Karakalpak bazaltwool» kárxanasınıń saltanatlı ashılıw máresimi ótkerildi.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı kárxananıń tolıq iske túsiwi múnásibeti menen qutlıqladı.
Atap ótilgenindey, sońǵı jılları elimiz ekonomikasınıń barlıq tarawlarında júz berip atırǵan ózgerisler menen jańalanıwlar hár bir insanda maqtanısh sezimlerin oyatpaqta.
Mine usınday ámeliy jumıslar qatarında bazalt mineralınan ıssılıq saqlawshı materiallar islep shıǵarıwshı jańa kárxana paydalanıwǵa tapsırıldı. Ulıwma bahası 50 mln. dollar bolǵan bul jańa kárxananıń iske túsiwi menen jılına 40 mıń tonnaǵa shekem ónim islep shıǵarıw jolǵa qoyılmaqta. Sonday-aq, 200 ge jaqın puqaranı turaqlı jumıs penen támiyinlew imkaniyatı jaratılmaqta. Jáne bir áhmiyetli tárepi, kárxana tárepinen islep shıǵarılǵan ónimler, tek ǵana ishki bazarlarǵa emes, eksportqa da baǵdarlanıp, elimizge valyuta túsimin támiyinlewge de xızmet etedi.
Ótkerilgen ilaj dawamında nuranıy-aqsaqallar, belsendi hayal-qızlar hám keń jámiyetshilik wákillerinen ibarat miymanlar kárxana jumısları menen jaqınnan tanıstı.

Qaraqalpaqstan xabar agentligi