Berdaq atındaǵı Qaraqalpaq mámleketlik universitetinde Ózbekstan hám Qaraqalpaqstan xalıq shayırı, kórkem sóz sheberi Tilewbergen Jumamuratovtıń 110 jıllıǵına baǵıshlanǵan ádebiy keshe shólkemlestirildi.

Ádebiy keshede Qaraqalpaqstan Respublikası Ministrler Keńesi Baslıǵınıń ruwxıy-aǵartıwshılıq jumısları nátiyjeliligin arttırıw, mámleketlik til haqqındaǵı nızam hújjetlerine ámel etiliwin támiyinlew máseleleri boyınsha másláhátshisi-departament baslıǵı P.Dabılov, Berdaq atındaǵı Qaraqalpaq mámleketlik universitetiniń jaslar máseleleri hám ruwxıy-aǵartıwshılıq isleri boyınsha prorektorı S.Alawatdinov, shayırdıń qızı universitettiń jurnalistika kafedrasınıń professorı Malika Jumamuratova, sonday-aq, ádebiyat hám kórkem óner ǵayratkerleri, professor-oqıtıwshılar, student-jaslar hám keń jámiyetshilik wákilleri qatnastı.
Ótkerilgen keshede shıǵıp sóylegenler Tilewbergen Jumamuratovtıń ómiri hám dóretiwshilik jolı, onıń qaraqalpaq ádebiyatın rawajlanıdırıwdaǵı tutqan ornı, adamgershilik, Watansúyiwshilik, milliy ózlik hám ruwxıy páklik ideyaların jırlaǵan shıǵarmaları haqqında hár tárepleme toqtap ótti. Shayırdıń dóretiwshiligi tek ǵana milliy ádebiyatımız emes, al, túrkiy tilles xalıqlar ádebiyatında múnásip orın iyelegeni, onıń shıǵarmaları túrli tillerge awdarılıp, xalqımızdıń ruwxıy baylıǵın dúnyaǵa tanıtıwda úlken áhmiyetke iye bolǵanı atap ótildi. Sonday-aq, shıǵıp sóylegenler shayırdıń dóretiwshilik miyrasın, onıń insanıylıq pazıyletlerin, ádebiyatqa bolǵan sadıqlıǵın hám jas áwladlardı tárbiyalawdaǵı xızmetlerin húrmet penen eske aldı hám bul ilaj qatnasıwshılarında tereń tásir qaldırdı.
Ádebiy keshe kórkem óner tarawı wákilleriniń atqarıwındaǵı qosıq hám ayaq oyınlar menen jáne de payızlı túske endi. Qábiletli student-jaslar tárepinen shayır shıǵarmalarınan úzindiler oqıldı.
Bul ádebiy keshe ullı sóz zergerine bolǵan húrmet belgisi bolıw menen birge, jaslardıń sanasında milliy ádebiyatqa muhabbat, kórkem sózge itibar hám ruwxıy qádiriyatlarǵa sadıqlıqtı jáne de bekkemlewge xızmet etti.

Adilbay Orazov,
Qaraqalpaqstan xabar agentligi sholıwshısı