Ózbekstan Respublikası Prezidentiniń Pármanı

Puqaralardıń rásmiy sánelerdi nıshanlaw dáwirinde tolıq dem alıwı ushın sharayatlar jaratıw, “Ózbekstan boylap sayaxat et!” ishki turizmdi rawajlandırıw baǵdarlaması sheńberinde ishki hám zıyarat turizmin jáne de rawajlandırıw ushın dem alıs hám bayram kúnlerinen nátiyjeli paydalanıwdı támiyinlew maqsetinde qarar etemen:
Tómendegi qosımsha dem alıs kúnleri belgilensin:
(a) 2025-jılda barlıq xizmetkerler ushın (jumıs háptesiniń túrine qaramastan) 31-dekabr – sárshembi;
(b) 2026-jılda:
(i) barlıq xizmetkerler ushın (jumıs háptesiniń túrine qaramastan): 2-yanvar – juma, 28-may – piyshembi, 29-may – juma, 31-avgust – dúyshembi;
(ii) altı kúnlik jumıs háptesinde isleytuǵın xızmetkerler ushın: 3-yanvar – shembi, 30-may – shembi, 31-dekabr – piyshembi.
2. Miynet kodeksiniń 208-statyasına muwapıq:
(a) islenbeytuǵın bayram kúnleri esaplanatuǵın 8-mart – Hayal-qızlar kúni bayramı 2026-jılı ekshembi – dem alıs kúnine hám 21-mart – Nawrız bayramı jáne 9-may – Eslew hám qádirlew kúni bayramları bes kúnlik jumıs háptesinde isleytuǵın xızmetkerler ushın shembi – dem alıs kúnine tuwrı keliwi múnásibeti menen usı dem alıs kúnleri sáykes túrde 2026-jıl 9-mart, 23-mart hám 11-may – dúyshembi kúnlerine kóshiriliwi;
(b) óndirislik-texnikalıq hám shólkemlestiriw sharayatları (bar úzliksiz óndiris, xalıqqa kúndelikli xızmet kórsetiw, náwbetshilik tiykarında islew hám basqalar) sebepli jumıs islemeytuǵın bayram kúnleri toqtatıp turıw múmkin bolmaǵan jumıslardı orınlawda dem alıs kúnleri kóshirilmeytuǵını maǵlıwmat ushın qabıl etilsin.
3. Bes kúnlik jumıs háptesinde isleytuǵın xızmetkerler ushın dem alıs kúni 2026-jılda 12-dekabr – shembi kúninen 31-dekabr – piyshembi kúnine kóshirilsin.
4. Bayram (islenbeytuǵın) kúnleriniń uzaytırılıwın esapqa alǵan halda respublika xalqınıń kewilli dem alıwı ushın:
(a) Turizm komiteti hám Mádeniy miyras agentligi turizm kórsetiw obektleri (mádeniy miyras obektleri, muzeyler) hám miymanxana xızmetleri ushın shegirmeler beriliwin jáne akciyalar ótkeriliwin shólkemlestirsin;
(b) Ózbekstan kásiplik awqamları federaciyasına Densawlıqtı saqlaw ministrligi, Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri menen birgelikte sanatoriyler hám salamatlandırıw mákemeleri ushın shegirmeler beriw jáne akciyalar ótkeriw usınıs etilsin;
(v) “Uzbekistan Airways” AJ hám “Ózbekstan temir jolları” AJǵa ishki transport qatnawları ushın shegirmeler beriw hám akciyalar ótkeriw usınıs etilsin.
5. Ózbekstan kásiplik awqamları federaciyasına:
(a) miynet jámáátleri arasında usı Pármannıń maqseti, mazmun-mánisi haqqında túsindiriw jumısların shólkemlestiriw;
(b) sozdırılǵan bayram kúnlerinde xızmetkerler hám olardıń shańaraq aǵzalarınıń mazmunlı dem alıwın támiyinlew boyınsha kásiplik awqamları shólkemleriniń jumısın jedellestiriw usınıs etilsin.
6. Ózbekstan Milliy teleradiokompaniyası Ózbekstan Milliy málimleme agentligi menen birgelikte bayram kúnleri ótkeriletuǵın ilajlar haqqında ǵalaba xabar quralları, sonıń ishinde, Internet jáhán málimleme tarmaǵı arqalı xalıqtıń keńnen xabardar etiliwin támiyinlesin.
7. Ózbekstan Respublikası Prezidentiniń 2024-jıl 24-dekabrdegi “Jańa jıl bayramın belgilew dáwirinde qosımsha islenbeytuǵın kúndi belgilew hám dem alıs kúnin kóshiriw haqqında”ǵı PQ-452-sanlı qararı óz kúshin joyıtqan dep esaplansın.
8. Usı Párman 2027-jıl 1-yanvardan baslap óz kúshin joyıtadı.
9. Usı Pármannıń orınlanıwın qadaǵalaw Ózbekstan Respublikasınıń Bas ministri A.N.Aripovqa júklensin.

Ózbekstan Respublikası Prezidenti
Sh.Mirziyoev.