Qaraqalpaqstan kórkem óner sarayında Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń qala hám rayonlardaǵı kóshe biyleri, máhálle hám awıllardaǵı nuranıy-aqsaqallar menen ushırasıwı ótkerildi.
Onda Joqarǵı Keńes Baslıǵı sońǵı jılları Prezidentimizdiń Qaraqalpaqstanǵa bolǵan ayrıqsha itibarı menen elimizde ámelge asırılıp atırǵan keń kólemli reformalar, regionımızdı hár tárepleme rawajlandırıw boyınsha óz aldına qabıl etilgen qarar, pármanlar haqqında keń túrde maǵlıwmatlar berdi.
Ushırasıwda tiykarınan tek ǵana Qaraqalpaqstan ushın 2017-jıldan berli 78 párman hám qarar qabıl etilip, házirgi waqıtta 38 hújjettiń orınlanıwı dawam etip atırǵanı, sonday-aq, xalıqtıń iygiligi jolında ámelge asırılǵan jumıslar, búgingi kúnde dawam ettirilip atırǵan iygilikli isler, aldaǵı waqıtta ámelge asırılıwı belgilengen wazıypalar keń túrde sóz etildi.
Sonı da ayrıqsha atap ótiw kerek, ótken jılları Qaraqalpaqstan tariyxında ayrıqsha áhmiyetke iye waqıyalarǵa tolı boldı, desek aljaspaǵan bolamız. Sebebi, bul qısqa waqıt ishinde keń kólemli reformalar ámelge asırılıp, bul iygilikli islerdiń ámeliy nátiyjeleri hár bir shańaraqqa jetip barmaqta.
Qaraqalpaqstan ushın mámleketimizdiń basqa regionlarında joq jeńillikler berilip, bunıń nátiyjesinde xalıqtıń turmıslıq mashqalalarına sheshim tabıw, isbilermenlikti qollap-quwatlaw, respublikamızdı sociallıq-ekonomikalıq jaqtan rawajlandırıw jumısları jańa basqıshqa kóterildi.
Ótkerilgen ushırasıwda mine usınday iygilikli ámeller keń túrde sóz etildi.
Ushırasıw dawamında máhállelerde awızbirshilikti saqlaw, jaslardı ana Watanǵa sadıqlıq ruwxında tárbiyalaw, uzaq jıllıq ómir tájiriybesi menen kópshilikke úlgi bolıp atırǵan kóshe biyleri Qaraqalpaqstan Respublikası Joqarǵı Keńesi Prezidiumınıń qararı tiykarında «Húrmet jarlıǵı» menen sıylıqlandı.

Qaraqalpaqstan xabar agentligi