Paytaxtımızdaǵı Kásiplik awqamları sarayında Shańaraq hám hayal-qızlar komiteti tárepinen “Jıl hayalı” milliy tańlawınıń jáne “Eń úlgili hayal-qızlar belsendisi” tańlawınıń respublikalıq basqıshı jeńimpazların sıylıqlaw máresimi bolıp ótti.

Onda hár qıylı ministrlikler hám uyımlar, jámiyetlik shólkemlerdiń wákilleri, ǵalaba xabar qurallarınıń xızmetkerleri, orınlardaǵı shańaraq hám hayal-qızlar komitetleriniń juwapkerleri, belsendi hayal-qızlar qatnastı.
Ilaj aldınan mámleketimizde hayal-qızlarǵa húrmet kórsetiw baǵdarındaǵı iygilikli jumıslarǵa baylanıslı videofilm kórsetildi.
Mámleketimiz basshısı Shavkat Mirziyoevtiń baslaması tiykarında elimizde hayal-qızlardı qollap-quwatlaw, olardıń mashqalaların óz waqtında hám unamlı sheshiw baǵdarındaǵı sistemalı jumıslardıń joqarı nátiyjeleri haqqında hár tárepleme sóz etildi. Ózbekstanda hayal-qızlardıń máplerin támiyinlewge baylanıslı jaratılǵan milliy sistema xalıqaralıq kólemde de joqarı tán alınıp atırǵanı ayrıqsha atap ótildi.
Ilajda máhálleden baslanǵan iygilikli baslamalardı respublika kóleminde ámeliy hám nátiyjeli háreketke aylandıra alǵan “Eń úlgili hayal-qızlar belsendisi” tańlawınıń jeńimpazları sıylıqlandı.
“Eń úlgili hayal-qızlar belsendisi” tańlawınıń jeńimpazları sıpatında eldiń isenimine erisken, intaker hám juwapkershilikli 14 hayal-qızlardıń ibratlı jumısları ayrıqsha atap ótildi. Olar óz jumısı menen máhállede unamlı ortalıq jaratıw, xalıqtıń sociallıq belsendiligin arttırıw hám jańa Ózbekstan reformaların tómengi buwında nátiyjeli ámelge asırıwǵa múnásip úles qosıp kelmekte.
Mámleketimizde bir neshe jıllardan berli ótkerilip kiyatırǵan “Jıl hayalı” respublikalıq tańlawı jámiyettiń rawajlanıwına múnásip úles qosıp kiyatırǵan, óziniń bilimi, intakerligi, pidayılıǵı hám jetekshilik pazıyletleri menen basqalarǵa úlgi bolıp atırǵan hayal-qızlardı tán alıwǵa qaratılǵanı menen áhmiyetli bolıp esaplanadı.
Sıylıqlaw máresimi dawamında hár eki tańlawdıń respublikalıq basqıshında jeńimpaz bolǵan hayal-qızlar húrmet jarlıqları hám estelik sawǵaları menen sıylıqlanıwı jaqsı dástúrge aylandı. Bul tán alıw tek ǵana jeke jetiskenliklerdiń joqarı bahası emes, al jámiyette hayal-qızlardıń belsendiligi, sociallıq juwapkershiligi hám jetekshilik potencialına bolǵan joqarı isenimniń kórinisi sıpatında kórinedi.
“Jıl hayalı” respublikalıq tańlawında Gran-pri – Joqarı orınǵa Samarqand wálayatı Kattaqorǵan qalasındaǵı “Anvarjon biznes invest” juwapkershiligi sheklengen jámiyetiniń basshısı Gulmira Jumaeva múnásip dep tabıldı. Oǵan Ózbekstan Respublikası Prezidentiniń sıylıǵı – avtomobil tapsırıldı.
– Mendey ápiwayı hayal bunday abıraylı tańlawlarda jeńimpaz bolıwı mámleketimizde hayal-qızlarǵa kórsetilip atırǵan joqarı itibardıń ámeliy úlgisi bolıp esaplanadı, – dedi Gulmira Jumaeva. – Búgin elimiz hayal-qızları da óz miyneti, izleniwleri, belsendi isbilermenlik háreketi menen mámleketimizdegi jańalanıw processlerine belsene úles qospaqta.
“Jıl hayalı” respublikalıq tańlawında birinshi orın Tashkent málimleme texnologiyaları universiteti Málimleme texnologiyalarınıń programmalıq támiynatı kafedrası professorı Dildora Muhamedovaǵa berildi.
– Mámleketimizde hayal-qızlarǵa qaratılıp atırǵan bunday húrmetten sheksiz minnetdarman, – dedi Dildora Muhamedova. – Bunday itibar bizlerdi jáne de kóbirek izleniwge, kúsh-ǵayrat penen miynet etiwge shaqıradı.
Ana-Watanımız, ǵárezsizligimiz, mámleketimizde bolıp atırǵan jedel jańalanıw processleri, hayal-qızlarǵa kórsetilip atırǵan mehir hám itibardı jırlaytuǵın úlken koncert baǵdarlaması qoyıp berildi.
Saltanatlı ilajda Ózbekstan Respublikası Bas ministriniń orınbasarı – Shańaraq hám hayal-qızlar komitetiniń baslıǵı Zulayho Mahkamova qatnastı.

Nazokat USMANOVA,
ÓzAnıń xabarshısı