Taxtakópir rayonında jumıs alıp barıwshı «Kausar Tegirmon» juwapkershiligi sheklengen jámiyetine qaraslı un zavodınıń saltanatlı ashılıw máresimi bolıp ótti.

Ilajda rayon hákimi Jambul Adilov qatnasıp, isbilermendi usı iri joybar hám kárxananıń iske túsiwi menen qızǵın qutlıqladı hám onıń aymaq ekonomikasın rawajlandırıw, isbilermenlikti qollap-quwatlaw, jańa jumıs orınların jaratıw hám de xalıqtı sapalı azıq-awqat ónimleri menen támiyinlewdegi áhmiyetin ayrıqsha atap ótti.
Bunnan soń ilaj qatnasıwshıları dándi qayta islew quwatlılıǵına iye zamanagóy un zavodınıń jumısı menen jaqınnan tanıstı.
Maǵlıwmat ornında aytıw kerek, Ózbekstan Respublikası Prezidentiniń Qaraqalpaqstan Respublikasın sociallıq-ekonomikalıq jaqtan jáne de rawajlandırıw, isbilermenlik subektlerin qollap-quwatlawǵa qaratılǵan párman hám qararlarınıń orınlanıwı sheńberinde jámiyet tárepinen 2024-jılı “Agrobank”tiń jeńilletilgen krediti esabınan ulıwma bahası 32 mlrd. sumlıq sharwashılıqtı rawajlandırıw hám sútti qayta islew joybarı ámelge asırıldı. Atap aytqanda, usı joybar sheńberinde, sırt eldiń 120 bas násilli qaramal alıp kelinip, ulıwma bahası 500 mln. sumlıq sútti qayta islew kárxanası iske qosıldı hám 7 puqara turaqlı jumıs penen támiyinlendi.
Búgingi kúni sharwashılıq kompleksinde Germaniya, Daniya hám Ukraina mámleketleriniń 170 bastan aslam násilli qaramallar baǵılıp, jámiyet qaramaǵındaǵı 500 gektar egislik maydanlarında sharwa malları ushın juǵımlı ot-shóp jetistirilmekte.
Sútti qayta islew kárxanasında bolsa, házirgi waqıtta qadaqlanǵan qatıq, smetana, yogurt, toraq hám tvorog sıyaqlı ónimler islep shıǵarılıp, ishki bazarǵa jetkerip berilmekte.
– Túrkiya texnologiyası tiykarında qurılǵan bul jańa un zavodında sutkasına 45 tonna dán qayta islenip, «Taxtakópir» markası menen sapalı un islep shıǵarıladı, -deydi «Kausar Tegirmon» juwapkershiligi sheklengen jámiyetiniń baslıǵı Allayar Madreymov. – Eń baslısı, bul joybar rayonımızdı sociallıq-ekonomikalıq jaqtan jáne de rawajlandırıw, xalıqtıń bántligin támiyinlew, jergilikli óndiris potencialın arttırıw hám bazardı sapalı hám básekige shıdamlı azıq-awqat ónimleri menen támiyinlewde úlken áhmiyetke iye bolıp, joybarlar sheńberinde 100 den aslam jańa jumıs orınları jaratıladı.
Sonday-aq, jámiyet aǵzaları Ózbekstan Respublikası Prezidentiniń 2023-jıl 8-avgust kúngi «Qaraqalpaqstan Respublikasında isbilermenlerge qolaylı sharayatlar jaratıwǵa baylanıslı qosımsha ilajları haqqında»ǵı Pármanına tiykarlanıp, Dáwqara APJ aymaǵınan 100 gektar jer maydanın alıp, jámi bahası 10 mlrd. 300 mln. sumlıq intensiv miyweli baǵ egiw jaratıw islerin alıp barmaqta.

Adilbay Orazov,
Qaraqalpaqstan xabar agentligi sholıwshısı.