Ózbekstan Xalıq demokratiyalıq partiyası Qaraqalpaqstan Respublikası Keńesi tárepinen “Eń belsendi deputat” tańlawınıń Qaraqalpaqstan Respublikası basqıshı ótkerildi.

“Baslama hám ideyalarımız ǵárezsiz, jańa Ózbekstannıń rawajlanıwı ushın!” súreni astında ótkerilgen tańlawdıń tiykarǵı maqseti “Ózbekstan-2030” strategiyasınıń “Qorshaǵan ortalıqtı qorǵaw hám “jasıl ekonomika” jılı”nda ámelge asırıwǵa baylanıslı Mámleketlik baǵdarlamasınıń partiya saylawaldı baǵdarlamasına tiyisli bántleriniń orınlanıwın támiyinlewde jergilikli Keńeslerdegi deputatlıq toparlardıń jumıs nátiyjeliligin arttırıw, partiyanıń saylawaldı baǵdarlamasınıń orınlanıwın támiyinlewde barlıq dárejedegi deputatlıq korpusınıń potencialın jetilistiriwden ibarat.
Onda Ózbekstan Xalıq demokratiyalıq partiyası Qaraqalpaqstan Respublikalıq Keńesiniń baslıǵı, Qaraqalpaqstan Respublikası Joqarǵı Keńesindegi ÓzXDP frakciyasınıń basshısı X.Eshimbetov shıǵıp sóylep, ilaj qatnasıwshıların qutlıqladı.
Tańlawda rayon hám qala basqıshınıń jeńimpazları 3 shárt, yaǵnıy, xalıqtıń mashqalasın sheshiwdiń eń nátiyjeli jolı, siyasiy tez juwap beriw hám mashqalanı sheshiw shártleri boyınsha óz bilim hám tájiriybelerin kórsetti.
Tóreshiler quramınıń bahalaw nátiyjesi boyınsha 11-“Qumbız” saylaw okruginen Xalıq deputatları Xojeli rayonlıq Keńesiniń deputatı Nargiza Primbetova birinshi orındı iyeledi hám tańlawdıń Respublikalıq basqıshında qatnasıw jollamasın qolǵa kirgizdi.
Ekinshi orındı 1-“R.Nizamatdinov” saylaw okruginen Xalıq deputatları Shımbay rayonlıq Keńesiniń deputatı Hamza Abdijaliev hám 20-“Taxtakópir” saylaw okruginen Xalıq deputatları Taxtakópir rayonlıq Keńesiniń deputatı Timur Jusipovlar iyeledi. Al, sıylı úshinshi orındı 16-“Qutankól” saylaw okruginen Xalıq deputatları Nókis rayonlıq Keńesiniń deputatı Raxat Purxanov, 11-“N.Dáwqaraev” saylaw okruginen Xalıq deputatları Qanlıkól rayonlıq Keńesiniń deputatı Húrliman Atambetova hám 8-“Berdaq” saylaw okruginen Xalıq deputatları Taqıyatas rayonlıq Keńesiniń deputatı Yusupbay Abdisadikovlar qolǵa kirgizdi. Sonday-aq, bir qatar belsendi deputatlar arnawlı nominaciyalar menen sıylıqlandı.
Jeńimpazlar arnawlı diplom hám estelik sawǵalar tapsırıldı.

Adilbay Orazov, Qaraqalpaqstan xabar agentligi sholıwshısı.