Qaraqalpaqstan kórkem óner sarayında «Qaraqalpaqfilm» mámleketlik unitar kárxanası tárepinen tayarlanǵan «Qarabay» komediyalıq filminiń premerası bolıp ótti.

Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnastı.
Ótkerilgen ilajda atap ótilgenindey, sońǵı jılları elimizde barlıq tarawlar qatarında, mádeniyat hám kórkem óner tarawın qollap-quwatlaw, kino tarawın rawajlandırıw baǵdarında da kѳplegen iygilikli isler ámelge asırılmaqta. Atap aytqanda, elimiz tariyxına, ádebiyatına baylanıslı, dáwir qaharmanlarına baǵıshlanǵan bir qatar filmler túsirilip, tamashagóyler názerine usınılmaqta. Sonday-aq, derlik 6,5 mlrd. sum qarjı esabınan «Qaraqalpaqfilm» kinostudiyası imaratında qurılıs-ońlaw jumısları alıp barılıp, zárúrli texnika hám ánjamlar menen támiyinlendi. Bunnan tısqarı, usı kѳrkem ѳner sarayında 4 mlrd. sum qarjı esabınan zamanagѳy kino zal shѳlkemlestirildi.
Mine usınday jaratılıp atırǵan imkaniyatlar nátiyjesinde kino tarawın rawajlandırıw boınsha jumıslar jańa basqıshqa kóterilmekte.
Premerası ótkerilip atırǵan filmniń xalqımız názerine usınılıwı da kino tarawına qaratılıp atırǵan itibardıń nátiyjesi desek aljaspaǵan bolamız.
Álbette, aldaǵı waqıtları da respublikamız kino dóretiwshileri tárepinen xalqımızdıń kewlinen orın alatuǵın ele de kóp filmler jaratıla beretuǵınına bekkem isenemiz.

Qaraqalpaqstan xabar agentligi