23-dekabr kúni Ózbekstan Respublikası Prezidenti Shavkat Mirziyoev hám Amerika Qurama Shtatları Prezidenti Donald Tramptıń telefon arqalı sóylesiwi bolıp ótti.

Mámleketimiz basshısı sóylesiw aldında AQSh Prezidentin jaqınlasıp kiyatırǵan jańa jıl bayramları menen qutlıqlap, dos Amerika xalqına tınıshlıq-paraxatshılıq, abadanlıq hám rawajlanıw tiledi.

Donald Tramp, óz gezeginde, Ózbekstan jetekshisi hám xalqına óziniń hám AQSh xalqınıń qızǵın sálemin jáne qutlıqlawların jollap, jańa jılda baxıt-ıǵbal hám jańa tabıslar tiledi.

Prezidentler joqarı dárejede erisilgen kelisimlerdiń orınlanıw barısın, sonday-aq, Ózbekstan – AQSh strategiyalıq sheriklik qatnasıqların bunnan bılay da rawajlandırıw perspektivaların tolıq kórip shıqtı.

Mámleketimiz basshısı Prezident Donald Tramptıń usı jılı ishki hám sırtqı siyasatta erisken tabısların joqarı bahalap, onıń ótkir xalıqaralıq krizisler hám kelispewshiliklerdi sheshiw baǵdarındaǵı nátiyjeli háreketlerin ayrıqsha atap ótti.

Eki tárepleme siyasiy sóylesiw hám almasıwlar, ásirese, jetekshiler dárejesinde jedellesip, mámleketlerimiz arasındaǵı strategiyalıq sheriklikti rawajlandırıwda jańa basqıshtı baslap bergeni hám onı anıq mazmun menen bayıtqanı qanaatlanıwshılıq penen atap ótildi.

Puqaralıq aviaciya, avtosanaat, taw-kán sanaatı, awıl xojalıǵı, infrastruktura, energetika hám ximiya, málimleme-kommunikaciya texnologiyaları hám basqa da tarawlarda onlaǵan milliard dollarlıq birgeliktegi joybarlar ámelge asırılmaqta.

Ámeldegi joybarlar menen baǵdarlamalardı nátiyjeli alǵa qoyıw hám jańaların islep shıǵıw maqsetinde Amerika – Ózbekstan isbilermenler hám investiciyalar keńesi shólkemlestirildi. Birgeliktegi Investiciyalıq fondtı shólkemlestiriw boyınsha jedel jumıs alıp barılmaqta.

Aymaqlar arasındaǵı birge islesiwdiń jańa mexanizmi iske qosıldı. Ózbekstannıń úsh wálayatı delegaciyaları Amerika shtatları menen birge islesiwdi jolǵa qoyıw ushın bul mámlekette boldı.

Xalıqaralıq hám regionallıq áhmiyetke iye máselelerge ayrıqsha itibar qaratıldı. Usı mánide, kóp tárepleme birge islesiw, sonıń ishinde, “S5+1” formatınıń áhmiyeti atap ótildi.

Sóylesiw juwmaǵında tárepler joqarı dárejedegi jedel sóylesiwlerdi dawam ettiriw niyetin tastıyıqladı hám ámeliy birge islesiw boyınsha birgeliktegi baslama hám baǵdarlamalardı alǵa qoyıwǵa kelisip aldı.

Ózbekstan Prezidenti Amerika jetekshisin ózi ushın qolaylı múddette mámleketimizge sapar menen keliwge mirát etti.

ÓzA