Qıstıń ayazlı kúnleri tábiyǵıy gaz tarmaqlarına jalǵanbaǵan respublikamızdıń alıs aymaqlarında jasawshı xojalıqlarǵa óz waqtında irkinishsiz suyıltılǵan gaz jetkerip beriw gaz támiynatı tarawı xızmetkerleriniń tiykarǵı wazıypalarınan sanaladı. Sonlıqtan házirgi kúnleri taraw xızmetkerleri ózleriniń wazıyplarına juwapkershilik penen qarap, alıs aymaqlardaǵı tábiyǵıy gaz jetip barıwı qıyın xojalıqlardı turaqlı túrde suyıltılǵan gaz ballonlar menen támiyinlep kelmekte. Ásirese, bul jumıslar Kegeyli rayonında jaqsı jolǵa qoyılǵan.

– Rayonımız boyınsha alıs aymaqlarda jasawshı 1926 shańaraqqa suyıltılǵan gaz jetkerip berilmekte, – deydi Kegeyli rayonlıq gaz támiynatı bólimi suyıltırılǵan gaz xızmeti baslıǵı Volodya Bekniyazov. – Bul alıs aymaqlardaǵı tutınıwshılardı úzliksiz suyıltılǵan gaz benen támiyinlewde barlıq sharayatlar jaratılǵan bolıp, gaz támiynatı tarawı xızmetkerleri hár qanday hawa rayı sharayatında da tutunıwshılarǵa óz waqtında gaz ballonlardı jetkerip kiyatır. Atap aytqanda, Aqtuba, Abat, Jańabazar, Jalpaqjap, Kókózek, Qumshúngil, Júzimbaǵ hám Iyshan qala awıl puqaralar jıyını aymaqlarındaǵı gaz tutınıwshıların suyıltılǵan gaz ballonlar menen támiyinlew ushın 3850 dana gaz ballon menen támiyinlengen. Usı jıldıń 1-dekabr jaǵdayına rayonnıń suyıltılǵan gaz tutınıwshılarına 312,94 tonna fond ajıratılıp, ámelde reje tolıǵı menen orınlandı.
Haqıyqatında da, Kegeyli rayonlıq gaz támiynatı bólimi xızmetkerleri tárepinen awıl turǵınlarınıń múshkilin jeńilletiw boyınsha kóplegen unamlı isler ámelge asırılmaqta. Olardıń bunday iygilikli islerinen aymaq xalqı bárha minnetdar.

Qaraqalpaqstan xabar agentligi