2026-jıl 1-yanvardan Ózbekstan sharayatında eko-stiker, yaǵnıy “Ekologiyalıq transport” sisteması kúshke kiredi. Sistemaǵa baylanıslı qaǵıydalar buzılǵanda járiymalar qollanıw bolsa 2 jıldan keyin baslanadı.

Búgin dúnyanıń hár bir múyeshinde ekologiyalıq turaqlılıq máselesi kún tártibine shıqqan. Sebebi taza hawa – salamat turmıs, salamat jámiyet bolsa turaqlı rawajlanıw degeni. Tilekke qarsı, sońǵı jıllarda hawanıń pataslanıwı insan salamatlıǵına ayrıqsha tásir kórsete basladı.
Avtomobiller, avtobuslar, júk mashinaları hám basqa háreketleniwshi texnika túrleri janılǵı janıwı procesinde hár túrli záhárli zatlardı hawaǵa shıǵaradı. Atmosfera pataslanıwı klimat ózgeriwi, hawa temperaturasınıń kóteriliwi hám kislotalı jawınlardıń kelip shıǵıwına sebep boladı. Ásirese, iri qalalarda transport quralları sanınıń kóbeyiwi hawa sapasınıń keskin tómenlewine alıp kelmekte.
Mashqalanı azaytıw ushın ekologiyalıq taza transport túrlerine ótiw, elektr hám gibrid avtomobillerden paydalanıw, jámiyetlik transporttı rawajlandırıw úlken áhmiyetke iye. Sonday-aq, avtomobillerdi óz waqtında texnikalıq tekseriwden ótkeriw, sapalı janılǵıdan paydalanıw hám háreket mádeniyatın arttırıw da zıyanlı gazler muǵdarın azaytıwǵa xızmet etedi.
Bizge belgili, 2026-jıl 1-yanvardan Ózbekstan sharayatında eko-stiker, yaǵnıy “Ekologiyalıq transport” sisteması kúshke kirmekte.
Xosh, eko-stiker reńi sáykes kelmeytuǵın aymaqqa kirgen aydawshı qanday tártipte anıqlanadı hám oǵan járiyma qollanıla ma? Ekologiya hám klimat ózgeriwi milliy komiteti tárepinen tiyisli ministrlikler hám uyımlar menen birgelikte Ishki isler ministrligi Jámiyetlik qáwipsizlik departamenti Jol háreketi qáwipsizligi xızmetiniń Tashkent qalası Mirabad rayonındaǵı “Fayzobod” transport quralların diagnostika tekseriw orayında “Ekologiyalıq transport” sistemasınıń mazmun-mánisi hám áhmiyetin jámiyetshilik arasında keńnen túsindiriw boyınsha shólkemlestirilgen ilajda bul sorawǵa da juwap berildi.
– Eko-stikerler úsh túrli – jasıl, sarı hám qızıl reńde boladı, – deydi IIM Jámiyetlik qáwipsizlik departamenti JPX baspasóz xatkeri Zoyir Ywldoshev. – Dáslep mashinası sarı yamasa qızıl stiker alǵan aydawshı stikerlerdiń reńin ózgertiw huqıqına iye. Mámleketimizdiń barlıq aymaqlarında diagnostika oraylarınıń jumısı jolǵa qoyılǵan. Sarı yamasa qızıl stiker alǵan puqaralar transport quralların usı diagnostikalıq tekseriwden ótkerip, stikerleriniń reńin ózgertiwi múmkin. Máselen, qızıl stikerli avtomashinalar taza aymaqqa kirmekshi bolǵanda tikkeley xabarlandırıp barıladı. Sebebi transport quralları haqqındaǵı maǵlıwmatlar hám esabatlar Jol háreketi qáwipsizligi sistemasında elektron tárizde júrgizilip barıladı. Bul baǵdarda birden-bir elektron sistema bar. Búgingi kúnde oraylıq qalalardıń kópshiliginde programmalastırılǵan kameralar hám baqlaw imkaniyatın beretuǵın basqa da qurallar bar.
Qánigeniń sózlerine bola, járiyma qollanıw sisteması 2026-jıl 1-yanvardan baslanbaydı. Eko-stiker reńi sáykes kelmeytuǵın aymaqqa kirgende aydawshılarǵa tiyisli tártipte járiymalar qollanıw 2 jıldan soń baslanadı.

Muhayyo Toshqoraeva,
ÓzA