Ózbekstan Respublikası Prezidentiniń 2021-jıl 9-avgusttaǵı PQ-5216-sanlı qararı tiykarında mámleketimizde jetim balalar hám ata-ana qaramaǵınan ayırılǵan jaslardı qollap-quwatlaw, olardı erkin turmısqa tayarlaw, múnásip sharayatlar menen támiyinlew baǵdarında sistemalı jumıslar ámelge asırılmaqta.

Jańa jıl bayramı aldınan Ózbekstan Respublikası Prezidenti janındaǵı sociallıq qorǵaw milliy agentligi Qaraqalpaqstan Respublikası basqarmasınıń buyrıǵı tiykarında Shımbay rayonındaǵı Shaxtemir, Berdaq, Jipek jolı mákan puqaralar jıyınlarında jaylasqan kóp qabatlı imaratlardan tórt jasqa jańa úydiń giltleri tapsırıldı.
Ilajǵa rayon hákiminiń orınbasarları A.Utemisov, G.Mambetniyazova, «Insan» sociallıq xızmetler orayı direktorı B.Babaxanovlar shıǵıp sóylep, sońǵı jılları elimizde Ózbekstan Respublikası Prezidenti tárepinen jaslardı hár tárepleme qollap-quwatlaw hám olarǵa qolaylı sharayatlar jaratıp beriw baǵdarında islenip atırǵan jumıslardı maqtanısh penen atap ótti hám bunday imkaniyatlardan jaslarımız nátiyjeli paydalanıw kerekligi haqqında atap ótti.
Bunnan soń imarat aldına tartılǵan lentalar saltanatlı jaǵdayda kesilip, ilaj qatnasıwshıları jańa úylerde jaslardıń jasawı ushın jaratılǵan sharayatlar menen jaqınnan tanıstı hám úy iyelerine jası úlkenler ózleriniń jaqsı tileklerin bildirdi.
Óz gezeginde jańa turaq jayǵa iye bolǵan Aydos Abdikadirov, Dáwran Dáwletbaev, Qudiret Ótebaev, Dáwran Jumaniyazov hám Timur Tájimuratov hám Gúljáhán Nurjanovalar da shıǵıp sóylep, ózlerine kórsetilip atırǵan ǵamqorlıq ushın húrmetli Prezidentimizge tereń minnetdarshılıǵın bildirdi.
– Men Timur Tájimuratov 21 jastaman. Húrmetli Prezidentimizdiń insan qádiri ushın principi tiykarında alıp barıp atırǵan ádil siyasatınıń arqasında búgin jańa turaq jayǵa iye boldım. Bunıń ushın Jurtbasshımızǵa úlken raxmet aytaman.
Haqıyqatında da elimizde bunday iygilikli isler insan qádiri ushın ámelge asırılıp atırǵanın anıq mısalında kóriwimizge boladı.

Adilbay Orazov,
Qaraqalpaqstan xabar agentligi sholıwshısı.