Húrmetli delegaciyalar basshıları!

Bárinen burın, Rossiya Federaciyası Prezidenti húrmetli Vladimir Vladimirovich Putinge miymandoslıq hám búgingi ushırasıwımızdı joqarı dárejede shólkemlestirgeni ushın bildirilgen minnetdarshılıq sózlerine qosılaman.
Belarus tárepiniń, Belarus Respublikası Prezidenti Aleksandr Grigorevich Lukashenkonıń Evraziya ekonomikalıq awqamına nátiyjeli basshılıǵın ayrıqsha atap ótpekshimen. Bul dáwirde kóp tárepleme ámeliy birge islesiw jańa pátke iye boldı.
Globallıq bazarlardıń barǵan sayın bólinip baratırǵanı, logistika shınjırlarınıń quramalasıp atırǵanı hám investiciyalıq resurslardı bólistiriwde tiykarǵı baǵdarlardıń ózgerip atırǵanı sharayatında biz ushın strategiyalıq hám tábiyǵıy sheriklerimiz bolǵan Evraziya ekonomikalıq awqamı mámleketleri menen pragmatikalıq hám óz-ara paydalı birge islesiwdi tereńlestiriw principiallıq áhmiyetke iye bolmaqta.
Húrmetli májilis qatnasıwshıları!
Baqlawshı mámleket statusındaǵı birge islesiwdiń keyingi tórt jılında Ózbekstannıń EAEA mámleketleri menen sırtqı sawda aylanısı derlik eki esege arttı.
Ekonomikalıq baylanıslar quramında joqarı qosımsha qunlı ónimlerdiń úlesi artıp atırǵanı, kooperaciyalıq joybarlardıń keńeyip atırǵanı turaqlı pát kórsetip atırǵanı ayrıqsha áhmiyetke iye.
Bul birge islesiwshilerimiz óndiris shınjırların bekkemlewden haqıyqıy mápdar ekenligin sáwlelendiredi.
Ózbekstan Evraziyanıń tiykarǵı formatlarında belsene qatnaspaqta.
Evraziya ekonomikalıq komissiyası menen sawda, sanaat, qarjı, agrar sanaat hám transport tarawlarında 40 qa shamalas anıq ilajlardı óz ishine alǵan úsh jıllıq reje ámelge asırılmaqta.
Birgeliktegi Jumısshı topar formatındaǵı jumıslar dawam etpekte: onıń besinshi májilisin kelesi jılı Tashkent qalasında ótkeriwdi rejelestirmektemiz.
Sonday-aq, EAEAnıń elektron sawdanı rawajlandırıw, júk tasıwdı sanlastırıw hám klimattıń ózgeriwine qarsı gúresiw boyınsha tarmaqlıq baǵdarlamalarında qatnaspaqtamız.
Ózbekstan hám EAEA bajıxana shegaraları arqalı alıp ótiletuǵın tovarlar hám transport quralları haqqında málimleme almasıw baǵdarında kelisim dúziw boyınsha sóylesiwlerdi baslaw haqqındaǵı qarardıń qabıl etilgenin alǵıslaymız.
Transshegaralıq maǵlıwmatlar almasıwı bajıxana qadaǵalawınıń nátiyjeliligin arttırıw, keshigiwlerdi azaytıw hám transport sistemalarımızdıń Evraziya koridorlarına integraciyalawǵa xızmet etetuǵınına isenemiz.
Ózbekstannıń Evraziya rawajlanıw bankine qosılıwı birge islesiwdi bekkemlewde áhmiyetli basqısh boldı. Bank penen birgelikte infrastruktura, energetika, metallurgiya, ximiya hám basqa da tarmaqlarda perspektivalı joybarlar portfeli qáliplestirildi.
Húrmetli kásiplesler!
EAEA menen birge islesiwdi keńeytiw baǵdarındaǵı tiykarǵı baǵdarlarımızdı qısqasha aytıp ótpekshimen.
Birinshi. Sawda tosqınlıqların basqıshpa-basqısh saplastırıw tiykarǵı wazıypa bolıp qalmaqta.
Texnikalıq jaqtan tártipke salıw, sanitariyalıq hám fitosanitariyalıq normalar baǵdarındaǵı qatnaslardı jaqınlastırıw maqsetinde ǴMDA hám EAEA institutları arasındaǵı muwapıqlastırıwdı jedellestiriw zárúr, dep esaplaymız.
Artıqsha tártip-qaǵıydalardı saplastırıw hám talaplardı birdey etiw boyınsha “jol kartası”n islep shıǵıw maqsetke muwapıq.
Texnikalıq jaqtan tártipke salıw, sertifikatlaw hám bajıxana hákimshiligindegi ayırmashılıqlar menen baylanıslı máselelerdi operativ sheshiw maqsetinde tarif hám tarif emes tosqınlıqlar boyınsha “Ózbekstan – EAEA” birgeliktegi Muwapıqlastırıwshı toparın dúziwdi usınıs etemiz.
Ekinshi. Sanaat kooperaciyasın rawajlandırıwǵa ayrıqsha itibar qaratpaqtamız.
Mashina qurılısı, energetika, agrosanaat kompleksi, ximiya hám basqa da tarmaqlardaǵı joybarlardıń dizimin birgelikte qáliplestiriw zárúr.
Ózbekstannıń ETRBǵa qosılıwı múnásibeti menen sherikliktiń strategiyalıq baǵdarların birgelikte belgilep alıw hám tiykarǵı infrastrukturalıq hám “jasıl” joybarlardı, kishi hám orta biznesti qollap-quwatlawdı qamtıp alǵan “jol kartası”n islep shıǵıw maqsetke muwapıq.
Bank tek ǵana qarjılandırıw deregi emes, al integraciya joybarlarına investiciyalardı tartıw katalizatorına aylanıwı múmkin ekenine bekkem isenemiz.
Úshinshi. Sanlı texnologiyalar tarawındaǵı birge islesiwdi kúsheytiw niyetindemiz.
Sanlı platformalardı, sonıń ishinde, elektron kommerciya hám sanlı markirovkanı óz-ara baylanıstırıw boyınsha EAEA menen “jol kartası”n tayarlawdı usınıs etemiz.
Bajıxana hákimshiligin sanlastırıw hám júk tasıwdıń “tigissiz” modeline ótiwdi de tiykarǵı wazıypa sıpatında kórmektemiz.
Tórtinshi. Biz EAEAnıń biomedicina, jańa materiallar, agrotexnologiyalar, energetika hám robototexnika sıyaqlı baǵdarlardı qamtıp alıwshı texnologiyalıq platformalarına qosılıwdan mápdarmız.
Besinshi. Turizm tarawında integraciyalasqan málimleme resursın qáliplestiriwge de qosılıwǵa tayarmız.
Bunday qatnas mámleketlerimiz turistlik ónimleriniń óz-ara baylanıslılıǵın támiyinlew imkaniyatın beredi.
Húrmetli doslar!
Ózbekstan EAEA menen ámeliy birge islesiwdi bunnan bılay da keńeytiw tárepdarı.
Pursattan paydalanıp, Qazaqstan Respublikası Prezidenti húrmetli Qasım-Jomart Kemelevich Toqaevqa Birlespege basshılıq Qazaqstanǵa ótiwi múnásibeti menen tabıslar tileymen.
Bársheńizdi hám dos xalıqlarımızdı kirip kiyatırǵan Jańa jıl menen jáne bir márte qızǵın qutlıqlap, tınıshlıq-tatıwlıq, abadanlıq hám rawajlanıw tileymen.
Itibarıńız ushın raxmet.