22-dekabr – jıldıń eń qısqa kúni hám eń uzın túni esaplanadı. Áyne usı kúni planetamızdıń tiykarǵı energiya deregi bolǵan quyash Jerge eń az jaqtılıq hám ıssılıq uzatadı. Tábiyattaǵı bul hádiyse insan turmısına hám xojalıq iskerligine tikkeley tásir kórsetedi. Suwıq kúsheyedi, túnler uzayadı, energiya jumsalıwı jıl dawamında eń joqarı noqatqa shıǵadı. Elektr energiyası, ıssılıq hám jaqtılıqqa bolǵan talap keskin artadı. Usınday bir kúnde energetika tarawı xızmetkerleriniń kásiplik bayramı belgileniwi simvolikalıq mániske iye bolıp, zamanagóy civilizaciyanıń energiyaǵa qanshelli baylanıslı ekenin esletedi.
22-dekabr energetiklerdiń kásiplik bayramı sıpatında Ukraina, Qırǵızstan, Rossiya hám Ózbekstan sıyaqlı bir qatar ǴMDA mámleketlerinde belgilenedi. Dáslep, energetikler kúni dekabr ayınıń úshinshi ekshembisinde belgilengen. Máselen, Qazaqstanda házirge shekem bul dástúr saqlanıp qalǵan. Biraq 1980-jıldan qabıl etilgen rásmiy qarar menen bayram 22-dekabrge kóshirildi.
Búgingi kúnde energetikasız turmıstı kóz aldımızǵa keltiriw qıyın. Jaqtılıq, ıssılıq, baylanıs, transport, málimleme texnologiyaları, medicina – bulardıń barlıǵı turaqlı energiya támiynatısız islemeydi. Ásirese, jıldıń eń suwıq hám qarańǵı dáwirinde energetika xızmetkerleriniń juwapkershiligi jáne de artadı.

Dildora Dwsmatova,
ÓzA