Yaponiyanıń abıraylı “The Japan News” gazetası “Ózbekstan kesilispede: Tashkent Oraylıq Aziyada jańa dáwirdi qalay qáliplestirmekte hám bul Yaponiya ushın neni ańlatadı?” atamasında maqala basıp shıǵardı.

Basılım úlkemizdi regiondı birlestirip atırǵan lokomotiv sıpatında súwretleydi. Ásirese, Oraylıq Aziya mámleket basshılarınıń turaqlı ushırasıwları, shegara kelisimleri, infrastruktura hám sawda integraciyası ayrıqsha tilge alınǵan.
– Region óz aldına mámleketler jıyındısı emes, al birden-bir ekonomikalıq hám strategiyalıq aymaq sıpatında kórilmekte. Oraylıq Aziya ishindegi sawda kólemi 4,5 esege arttı, óz-ara investiciyalar eki esege kóbeydi. Qospa kárxanalar, shegaralas sawda zonaları hám sanaat joybarları (awıl xojalıǵı, toqımashılıq, avtomobil qurılısı hám basqalar) keńeymekte. Jańa temir jollar, transport koridorları, logistika hám sanlı infrastruktura joybarları ámelge asırılmaqta, – delinedi maqalada.
Sonday-aq, gazeta betlerinde Yaponiya Ózbekstandı tek ǵana isenimli birge islesiwshi emes, al pútkil Oraylıq Aziyaǵa kiriw dárwazası sıpatında kórip atırǵanı bildirilgen.
– Ózbekstan hám Yaponiya qatnasıqları bekkem. Regionnıń integraciyalanıwı Yaponiya ushın infrastruktura, energetika, sanlı texnologiyalar hám investiciya tarawlarında jańa imkaniyatlar jaratpaqta. Ózbekstan Prezidentiniń siyasatı Oraylıq Aziyanı jáne de turaqlı, integraciyalasqan hám perspektivalı regionǵa aylandırıwǵa qaratılǵan, – dep jazadı avtor.
Maǵlıwmat ornında: “The Japan News” kúnshıǵıs elindegi eń abıraylı inglis tilindegi basılımlardan biri esaplanıp, “Yomiuri Shimbun” media toparınıń quramına kiredi. Onıń auditoriyası – diplomatlar, siyasatshılar, investorlar, akademiyalıq toparlar. Basılım Yaponiyanıń ishki hám sırtqı siyasatı, ekonomika, xalıqaralıq qatnasıqlar jáne mádeniy processler boyınsha analitikalıq hám isenimli materialları menen ajıralıp turadı, sonlıqtan ol xalıqaralıq jámiyetshilik ushın áhmiyetli málimleme deregi sıpatında tán alınadı.

W.Alimov,
ÓzA