Ózbekstan Respublikası Prezidenti Shavkat Mirziyoev 18-dekabr kúni rásmiy sapar menen Tokio qalasına keldi.
“Xaneda” xalıqaralıq aeroportında mámleketimiz basshısın Yaponiya ishki isler hám kommunikaciyalar ministri Yoshimasa Xayashi hám basqa da rásmiy shaxslar kútip aldı.

Tokio qalasına kelgen Prezident Shavkat Mirziyoev Yaponiyada miynet etip atırǵan hám bilim alıp atırǵan watanlaslarımız benen ushırasıp, olar menen sáwbetlesti.
Mámleketimizde ámelge asırılıp atırǵan reformalar, watanlaslarımızdıń arzıw-niyetleri, maqset hám rejeleri haqqında ashıq hám qızǵın pikirlesiw bolıp ótti.
Prezidentimiz watanlaslarımızǵa jumısı hám oqıwında tabıslar tilep, olar kúnshıǵıs elinde arttırǵan bilim hám tájiriybeler Watanımızdıń rawajlanıwı hám xalqımızdıń abadanlıǵına xızmet etetuǵınına isenim bildirdi.
Sapardıń tiykarǵı ilajları 19-20-dekabr kúnleri bolıp ótedi. Ózbekstan Prezidenti Yaponiya Imperatorı Naruxito, Bas ministri Sanae Takaichi hám basqa da rásmiyler, isbilermen toparlar hám akademiyalıq jámiyetshilik wákilleri menen ushırasıwlar ótkeredi.
Sonday-aq, Ózbekstan jetekshisi “Oraylıq Aziya + Yaponiya” qarım-qatnasınıń birinshi sammitinde qatnasadı.

ÓzA