Ájiniyaz atındaǵı Nókis mámleketlik pedagogikalıq institutında «Keleshekke qádem» baǵdarlaması sheńberinde pitkeriwshi jaslardı miynet bazarına tayarlaw, olardıń finanslıq bilimin arttırıw, isbilermenlikke bolǵan qızıǵıwshılıǵın kúsheytiw hám ózleriniń biznes ideyaların ámelge asırıw boyınsha ámeliy bilim hám kónlikpeler beriw maqsetinde seminar-trening shólkemlestirildi.

Ilajǵa «Ózmilliybank» AJ Qaraqalpaqstan Respublikası basqarmasınıń qánigesi K.Sharipova, Biznesti rawajlandırıw bankiniń mentor-treneri N.Atamuratova, «Moynaq tur» jámiyetiniń baslıǵı, isbilermen A.Bekjanova, sonday-aq, instituttıń pitkeriwshi kurs studentleri qatnastı.
– Institutımızda pitkeriwshi kurs studentleriniń isbilermenlik baslamaların qollap-quwatlaw hám turmısqa engiziw maqsetinde «Keleshekke qádem» orayı jumıs alıp barmaqta. Usı orayǵa múrájat etken studentlerge biznes joybarların islep shıǵıw, jeńillikli kreditler menen támiyinlew hám isbilermenlik jumısların jolǵa qoyıw baǵdarında joqarı nátiyjelerge erisip atırmız. Atap aytqanda, búgingi kúnge shekem orayımız arqalı institutımızdıń 64 pitkeriwshi studentine óz isbilermenligin jolǵa qoyıwı ushın 1 milliard 683 million sumlıq kredit qarjıları ajıratıldı, – deydi institut registrator ofisiniń menedjeri, «Keleshekke qádem» orayınıń juwapkeri Nursultan Tańbaev.
Seminar dawamında bank xızmetkerleri tárepinen jaslarǵa jeńillikli kreditler, jaslar isbilermenligin qollap-quwatlaw mexanizmleri, startap joybarlardı qarjılandırıw imkaniyatları hám bank xızmetlerinen nátiyjeli paydalanıw boyınsha tolıq maǵlıwmatlar berildi. Sonday-aq, shıǵıp sóylegen isbilermen óz miynet jolı dawamında toplaǵan tájiriybeleri, tabıslarǵa erisiw jolları, ushırasqan qıyınshılıqlar hám olardı jeńip ótiw boyınsha ámeliy másláhátleri menen ortaqlastı.
Ilajda studentler ózlerin qızıqtırǵan sorawlarǵa juwap aldı.

Qaraqalpaqstan xabar agentligi