Taxtakópir rayonı hákimliginde «Awıl xojalıǵı xızmetkerleri kúni» múnásibeti menen saltanatlı ilaj bolıp ótti.

Onda rayon hákimi J.Adilov, rayon hákiminiń awıl hám suw xojalıǵı máseleleri boyınsha orınbasarı Ó.Jaqsımov, rayonlıq Fermerler Keńesiniń baslıǵı E.Muratbaev, tarawǵa baylanıslı mákeme hám kárxanalardıń basshıları, fermer xojalıqlarınıń wákilleri qatnastı.
Ilajda rayon hákimi hám taraw basshıları shıǵıp sóylep, sońǵı jılları elimizde húrmetli Prezidentimiz basshılıǵında alıp barılıp atırǵan reformalardı joqarı bahalap, taraw xızmetkerlerin kásiplik bayram menen qutlıqladı hám awıl xojalıǵı tarawın rawajlandırıwǵa múnásip úles qosıp kiyatırǵan bir qatar aldıńǵı fermerlerge «Ilǵor fermer» kókirek belgisin hám estelik sawǵalardı tapsırdı.
– Bıyılǵı jılı rayonımız boyınsha 8619,9 tonna biyday, 3777,7 tonna paxta, 5367,4 tonna ovoщ, 4077 tonna palız, 2431,9 tonna kartoshka hám taǵı basqa da ónimler jetistirilip, belgilengen reje artıǵı menen orınlandı, – deydi rayon hákiminiń awıl hám suw xojalıǵı máseleleri boyınsha orınbasarı Ómirbay Jaqsımov. – Bunday tabıslardı qolǵa kirgiziwde fermerlerimizdiń islegen pidayı miynet ayrıqsha bolıp tabıladı. Búgin usınday aldınǵa fermerlerdiń bir toparı «Ilǵor fermer» kókirek belgisi hám estelik sawǵaları menen sıylıqlanıp atır. Bunıń ushın respublikamız basshılarına úlken raxmet aytamız.
Ilajda fermerler de shıǵıp sóylep, ózlerine kórsetilip atırǵan bunday joqarı húrmet hám xoshamet ushın rayon basshılarına minnetdarshılıq bildirip, aldaǵı waqıtları da usı pátti jazdırmastan miynet etiwge wáde berdi.

Adilbay Orazov,
Qaraqalpaqstan xabar agentligi sholıwshısı.