Ózbekstan Respublikası Prezidentiniń arnawlı párman hám qararları tiykarında elimizde jumıssız jaslardıń bántligin támiyinlew, olardı kásip-óner, shet tillerin úyreniwge baǵdarlaw hám jaslardıń sport penen shuǵıllanıwı ushın kóplegen qolaylı sharayatlar jaratıp berilmekte.

Álbette, ózlerine jaratılǵan bunday imkaniyatlardan respublikamızdıń barlıq jasları paydalanıp, sońǵı jılları bilimlendiriw, mádeniyat, kórkem óner hám sport tarawlarında bir qatar jetiskenliklerge erisip kelmekte. Ásirese, keyingi waqıtları jas sportshılarımızdıń mámleket chempionatı, kubogi hám xalıqaralıq sport jarıslarında kórsetip kiyatırǵan nátiyjeleri maqtawǵa turarlıq. Olardıń qolǵa kirgizgen tabısları keń jámiyetshiligimizdi quwanıshqa bólep, respublika hám rayon basshıları tárepinen múnásip túrde xoshametlenbekte.
Usınday xoshametlew ilajı Shımbay rayonında ótkerilip, onda sport túrleri boyınsha boks boyınsha 2025-jılı Prezident olimpiadası hám júziw sportı boyınsha jaslar arasında V Para Aziya oyınlarında jeńimpaz bolǵan sportshılar hám olardı tayarlawda ustazlıq etken trenerlerdi sıylıqlaw máresimi bolıp ótti.
Ilajda rayon hákimi A.Tajetdinov hám Qaraqalpaqstan Respublikası Prokurorı Sh.Aminovlar qatnasıp, jeńimpaz jaslarımızdı hám olardıń trenerlerin qolǵa kirgizgen úlken jeńisleri menen qutlıqlap, aldaǵı jarıslarda da jaqsı nátiyjelerge erisiwine tilekleslik bildirdi.
Ótkerilgen ilajda shımbaylı jas sportshılar hám olardıń trenerlerine shólkemlestiriwshiler tárepinen Húrmet jarlıǵı hám estelik sawǵalar tapsırıldı.
– Usı jılı ótkerilgen Prezident olimpiadasında boks boyınsha Gúlchehra Qoldasbaeva hám Gúlsimay Xojabaevalar gúmis hám qola medalların, Shaxnaza Erejepbaeva bolsa, V Para Aziya oyınlarında gúmis medaldı qolǵa kirgizip, xalqımızdı sheksiz quwanıshqa bólegen edi, – deydi Shımbay rayonı sport mektebiniń direktorı Baynazar Izbasarov. – Búgingi xoshametlew ilajı jaslarımızǵa ayrıqsha kúsh-jiger baǵıshlap, olardı jáne de alǵa qaray umtıldıradı. Sonlıqtan kelesi jılı da trenerlerimiz jaslar menen birge islesiwdi dawam etip, bıyıl qolǵa kirgizilgen nátiyjelerdi bunnan da joqarılatıw ushın háreket ete beredi dep xalqımızdı isendirip qalaman.
Xoshametlew ilajı rayonlıq mádeniyat bólimi xızmetkerleri tárepinen tayarlanǵan koncert baǵdarlaması menen kewilli dawam etti.

Adilbay Orazov,
Qaraqalpaqstan xabar agentligi sholıwshısı