Sırt el baspasózi Ózbekstan haqqında

Mámleketimiz basshısınıń Yaponiyaǵa saparı hám “Oraylıq Aziya + Yaponiya” sammiti haqqında bir qatar sırt el basılımlarında maqalalar basıp shıǵarılmaqta. Sonıń ishinde, Pakistannıń “Islamabad Post” elektron gazetasında “Ózbekstan-Yaponiya: Strategiyalıq sheriklik keńeymekte” atamasında maqala járiyalandı.
Onda atap ótiliwinshe, 1992-jıl 26-yanvarda eki úlke arasında diplomatiyalıq qatnasıqlar ornatılǵanınan berli Ózbekstan-Yaponiya birge islesiwin rawajlandırıw mámleketimizdiń Aziya-Tınısh okeanı regionı boyınsha sırtqı siyasatınıń tiykarǵı baǵdarı bolıp kelgen. Óz-ara húrmet hám isenimge tiykarlanǵan halda, Tashkent hám Tokio házirgi kúnde siyasat, qáwipsizlik, ekonomika, investiciya, innovaciya, bilimlendiriw, mádeniyat, turizm hám regionallıq birge islesiwdi qamtıp alǵan kóp tárepleme birge islesiwdi rawajlandırmaqta.
– Ózbekstan hám Yaponiya qarım-qatnası rawajlanıwınıń burılıs noqatı Prezident Shavkat Mirziyoevtiń 2019-jıl dekabr ayında Yaponiyaǵa rásmiy saparı boldı, bul iri birgeliktegi ekonomikalıq, investiciyalıq hám gumanitarlıq joybarlardı ámelge asırıwǵa kúshli túrtki berdi, – delinedi basılımda.
Avtordıń jazıwınsha, házirgi waqıtta Ózbekstanda Yaponiya kapitalınıń qatnasıwındaǵı 84 qospa kárxana jumıs alıp barmaqta hám mámlekette neft-gaz, ximiya, mashina qurılısı, logistika, bilimlendiriw hám turizm tarawlarında jumıs alıp baratuǵın 13 iri yapon kompaniyasınıń wákilxanaları bar.
Ásirese, eki úlke qatnasıqlarınıń mádeniy hám gumanitarlıq tárepleri ayrıqsha áhmietke ie. Máselen, Ózbekstan-Yaponiya doslıq jámieti, Fukushima-Ózbekstan awqamı hám Yaponiya-Ózbekstan awqamı jigirma jıldan aslam waqıt dawamında jedel jumıs alıp barıp kelmekte. Tashkentte ornatılǵan Xirosima tınıshlıq tası hám paytaxt orayındaǵı Yapon baǵı álleqashan xalıqlarımız arasındaǵı bekkem doslıqtıń simvolına aylanǵan.
Gwzal Sattorova,
ÓzA