Senattıń jalpı májilisinde “Salıq hám byudjet siyasatınıń 2026-jılǵa mólsherlengen tiykarǵı baǵdarları qabıl etilgenligi múnásibeti menen Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam dodalandı.

Atap ótilgenindey, kelesi jılǵa mólsherlengen salıq-byudjet siyasatınıń tiykarǵı baǵdarları, sonıń ishinde, ámeldegi nızamshılıqtı Jáhán sawda shólkemi kelisimlerine muwapıqlastırıw, Prezidentimizdiń isbilermenler menen ashıqtan-ashıq sóylesiwi sheńberinde belgilep berilgen wazıypalardıń orınlanıwın támiyinlew maqsetinde ayırım nızam hújjetlerine ózgerisler hám qosımshalar kirgizilmekte.
2026-jılda salıq siyasatında tiykarǵı salıq stavkaları qosımsha qun salıǵı 12 procent, payda salıǵınıń bazalıq stavkası – 15 procent, fizikalıq táreplerden alınatuǵın dáramat salıǵı – 12 procent, yuridikalıq táreplerdiń múlkine salınatuǵın salıq stavkası – 1,5 procent, awıl xojalıǵına mólsherlengen jerler ushın jer salıǵı – 0,95 procent, sociallıq salıq – 12 procent (byudjet shólkemleri – 25 procent), aylanıstan alınatuǵın salıq – 4 procent muǵdarında ózgerissiz qaladı.
Salıq kodeksinde qosımsha qun salıǵınıń úzliksiz shınjırın jaratıw, xalıqtıń salamat turmıs tárizin qollap-quwatlaw, suw resurslarınan aqılǵa uǵras paydalanıwdı támiyinlew názerde tutılmaqta.
Bul nızam mebel qurılısı hám zergerlik tarawlarında jumıs alıp barıp atırǵan isbilermenlerdi hár tárepleme qollap-quwatlaw, ónimlerdiń eksportın keńeytiw, xalıqtıń dáramatların arttırıw jáne turaqlı ekonomikalıq ósiwdi támiyinlewge de qaratılǵan.
Nızam ámeliyatqa engiziliwi nátiyjesinde isbilermenlerge qolaylı sharayatlar jaratıwǵa imkaniyat beretuǵın salıq minnetlemelerin orınlaw boyınsha tiyisli huqıqıy qatnasıqlar tártipke salınıwı názerde tutılmaqta.
Hákimshilik juwapkershilik haqqındaǵı kodekste mikrofirma hám kishi kárxanalarǵa salıq esabatların óz waqtında usınbaǵanı ushın járiyma muǵdarı azaytılıp, aqırǵı úsh ay ishinde salıq esabatların óz waqtında usınǵan salıq tólewshilerge keyingi esabattı 5 jumıs kúnine shekem keshiktirgen jaǵdayda hákimshilik járiyma qollanılmaytuǵını belgilenbekte.
Bunnan tısqarı, bir kalendar ayda bir neshe salıq túri boyınsha esabatlar óz waqtında usınılmaǵan jaǵdayda, barlıq esabatlar ushın tek ǵana bir járiyma qollanıw mexanizmi engizilmekte.
Senat aǵzaları ózleriniń shıǵıp sóylewlerinde ekonomikanıń túrli taraw hám tarmaqları, sonıń ishinde, awıl xojalıǵı, toqımashılıq, jergilikli sanaat, azıq-awqat, media hám baylanıs sıyaqlı tarawlarǵa bir qatar salıq hám bajıxana jeńillikleri berilip atırǵanın atap ótti.
Nızam xalıq deputatları jergilikli keńeslerine awıl xojalıǵına mólsherlengen jerler ushın belgilengen stavkaǵa salıstırǵanda 0,5 ten 1,2 ge shekemgi azaytıwshı hám arttırıwshı koefficientlerdi jáne lazerli tegisleniwi kerek bolǵan suwǵarılatuǵın jerler lazerli tegislenbegen jaǵdayda, usı jerler ushın paydalanılatuǵın suw kólemi boyınsha salıq stavkalarına salıstırǵanda 1,2 ge shekemgi arttırıwshı koefficientti qollanıw wákilligin bermekte.
Senatorlar maqullaǵan nızam isbilermenlik subektlerin hár tárepleme xoshametlew, teń hám ádil báseki ortalıǵın támiyinlew, hákimshilik járiymalar júgin jeńilletiw jáne jasırın ekonomikanıń úlesin qısqartıwǵa qaratılǵan.

N.Abduraimova,
N.Haydarov (súwret),
ÓzA