Tashkent qalasında ótkerilgen Oraylıq Aziya mámleketleri hám Koreya Respublikası parlamentleri basshılarınıń “Insan qádiri, sociallıq ádillik hám qorshaǵan ortalıqtı qorǵaw jolında birge islesiw” temasındaǵı úshinshi májilisi juwmaqlandı.

Júzden aslam parlament basshıları hám aǵzaları, jergilikli keńeslerdiń deputatları, diplomatiyalıq korpus wákilleri hám ǵalaba xabar qurallarınıń xızmetkerleri qatnasqan májilis sheńberinde “Milliy miyras” atamasındaǵı xalıq ámeliy kórkem óneri kórgizbesi jáne respublikalıq milliy-mádeniy oraylardıń kórkem óner kórgizbeleri shólkemlestirildi.
Ilaj sheńberinde ekonomikalıq birge islesiw, sanlı transformaciya hám sanaattı rawajlandırıw, sonday-aq, qorshaǵan ortalıqtı qorǵaw hám ekologiyalıq baslamalardı ámelge asırıwda parlamentlerdiń ornı máseleleri dodalandı. Parlamentlerdiń analitikalıq orayları hám ilimiy toparlarınıń wákilleriniń parlament jumısın ilimiy-analitikalıq jaqtan támiyinlew máselelerine baǵıshlanǵan dógerek sáwbeti bolıp ótti.
Májilis sheńberinde Senat Baslıǵı, Nızamshılıq palatası Spikeriniń parlament basshıları menen eki tárepleme ushırasıwları ótkerildi.
Jalpı májiliste parlamentleraralıq birge islesiwdiń tiykarǵı baǵdarların qamtıp alǵan Oraylıq Aziya mámleketleri hám Koreya Respublikası parlamentleri baslıqlarınıń úshinshi májilisiniń birgeliktegi deklaraciyası qabıl etildi.
Atap aytqanda, sanlı texnologiyalardı rawajlandırıw, qorshaǵan ortalıqtı qorǵaw, sociallıq qorǵaw, gender teńlik hám insan huqıqların alǵa qoyıw, bilimlendiriw, ilim, mádeniy-gumanitarlıq almasıw tarawlarında birge islesiwdi jedellestiriw haqqında qarar qabıl etildi.
Koreya Respublikası Milliy Assambleyasınıń Spikeri U Von Shik Ózbekstan, Tájikstan hám Qırǵızstan mámleketlik shegaralarınıń tutas noqatı haqqındaǵı shártnamanıń ratifikaciyalanıwın tariyxıy áhmiyetke iye waqıya sıpatında bahaladı.
Ózbekstannıń jasalma intellekt tarawında regionda jetekshi orın iyelep atırǵanı ayrıqsha atap ótildi. Mámlekette 5 million qánigeni jasalma intellekt tarawında tayarlawǵa qaratılǵan keń kólemli baǵdarlamanıń ámelge asırılıp atırǵanı atap ótilip, bul Ózbekstannıń strategiyalıq kózqarasların sáwlelendiriwi hám Oraylıq Aziyada zamanagóy texnologiyalarǵa turaqlı talaptı qáliplestirip atırǵanına itibar qaratıldı.
Dodalaw dawamında birge islesiwdi jáne de tereńlestiriw, regionda turaqlı rawajlanıwdı támiyinlew, sanlı texnologiyalar hám jasalma intellektti engiziw, suw resurslarınan aqılǵa uǵras paydalanıw hám klimat ózgeriwi aqıbetlerine qarsı gúresiw máseleleri áhmiyetli ekenligi atap ótildi.
Delegaciyalar Tashkent qalasındaǵı Islam civilizaciyası orayına bardı hám onıń jumısı menen jaqınnan tanıstı.
Bul májilis óz-ara isenim hám ámeliy birge islesiwdi bunnan bılay da bekkemlewdiń nátiyjeli maydanına aylanǵanı qatnasıwshılar tárepinen atap ótildi.

Norgul ABDURAIMOVA,
ÓzAnıń xabarshısı