Prezident Shavkat Mirziyoev sociallıq qorǵawǵa mútáj xalıqtı qollap-quwatlaw sistemasın bunnan bılay da jetilistiriw, aymaqlarda kompleksli sociallıq hám reabilitaciya xızmetlerin keńeytiw jáne balalardı zorlıqtıń barlıq túrlerinen qorǵawǵa qaratılǵan usınıslar menen tanıstı.

Kámbaǵal hám kámbaǵallıqqa túsiw qáwpi astında bolǵan shańaraqlardı anıqlaw, olarǵa kórsetiletuǵın sociallıq járdem hám xızmetlerdi birden-bir sistema tiykarında xalıqtıń real talaplarınan kelip shıqqan halda shólkemlestiriw baǵdarındaǵı jumıslar kórip shıǵıldı.
Ótken dáwirde Sociallıq qorǵawdıń birden-bir reestri sheńberinde 1,8 million shańaraqtıń sociallıq jaǵdayı bahalanıp, 739 mıń shańaraq, sonıń ishinde, kámbaǵal hám kámbaǵallıq shegarasındaǵı shańaraqlar reestrge kirgizildi. Olarǵa napaqa hám materiallıq járdemler tayınlandı.
Endi bul baǵdardaǵı jumıslardı bunnan bılay da jetilistiriw maqsetinde Sociallıq qorǵawdıń birden-bir reestri jáne Kámbaǵal shańaraqlar reestri tiykarında Sociallıq reestr júrgiziledi hám onda shańaraqlar sociallıq-ekonomikalıq jaǵdayınan kelip shıǵıp ayrıqsha kategoriyalarǵa – mámleket támiynatındaǵı shańaraqlar, kámbaǵal shańaraqlar jáne kámbaǵallıq shegarasındaǵı shańaraqlarǵa ajıratıladı, hár bir kategoriyaǵa sáykes járdem hám xızmetler kórsetiledi.
Sociallıq qollap-quwatlaw ilajları xalıqtıń dáramat dárejesi hám bántlik imkaniyatlarınan kelip shıqqan halda differenciallasqan qatnas tiykarında ámelge asırıladı.
Atap aytqanda, ayırım kategoriyadaǵı imkaniyatı sheklengen shańaraqlar ushın bántlik talap etpegen halda sociallıq járdemler beriw sisteması jolǵa qoyıladı, “máhálle jetiligi”ne miynet etiw imkaniyatı sheklengen hám awır turmıslıq jaǵdaydaǵı shańaraqlardı Sociallıq reestrge kirgiziw huqıqı beriledi.
Sonday-aq, reestrge kirgizilgen shańaraqlardıń dáramatın arttırıw, densawlıqtı saqlaw, bántlik, turaq jay hám basqa da baǵdarlarda sociallıq xızmetler kórsetiw, miynetke jaramlı aǵzalardı bántlikke tartıw hám isbilermenlikke baǵdarlaw ilajları kóriledi.
Aymaqlarda mútáj xalıqqa kompleksli sociallıq hám reabilitaciya xızmetlerin kórsetiwdi keńeytiw maqsetinde aymaqlıq sociallıq xızmetler oraylarınıń jumısın jolǵa qoyıw usınıs etildi. 2026-2027-jıllarda 20 usınday oraylardı shólkemlestiriw rejelestirilgen. Oraylarda qaraw, kútiw, abilitaciya, reabilitaciya hám bilimlendiriwge baylanıslı kompleksli xızmetler kórsetiledi.
Oraylar arqalı mayıplıǵı bolǵan shaxslar, basqalardıń kútimine mútáj puqaralar hám jalǵız shaxslardı qamtıp alıw, kúndizgi xızmetler esabınan olardı sociallıq mákemelerge turaqlı jaylastırıwdı qısqartıw názerde tutılǵan.
Sonday-aq, xızmetlerden paydalanıw processlerin sanlastırıw, elektron jollamalardı engiziw hám kórsetilip atırǵan xızmetlerdiń monitoringin támiyinlew belgilengen.
Prezidentimizge 2026-2030-jıllarda balalardı zorlıqtıń barlıq túrlerinen qorǵaw boyınsha islep shıǵılǵan strategiya haqqında málimleme berildi.
Strategiya balalar ushın zorlıqsız ortalıq jaratıw, zorlıq qáwpi astındaǵı balalardı erte anıqlaw hám jábirleniwshi yamasa gúwa bolǵan balalarǵa kompleksli xızmetler kórsetiwdi tiykarǵı maqset etip alǵan.
Bul hújjet sheńberinde balalarǵa qarata zorlıq jaǵdaylarınıń aldın alıw, qáwip astındaǵı balalar menen erte basqıshta islesiw, balalar hám olardıń shańaraqlarına sociallıq, psixologiyalıq, bilimlendiriw hám huqıqıy xızmetlerdi usınıw boyınsha tiykarǵı baǵdarlar belgilengen.
Strategiyada balalar menen islesiwde sociallıq qatnasqa tiykarlanǵan kishi kólemli, ashıq formattaǵı oraylardıń jumısın jolǵa qoyıw, hár bir bala boyınsha individuallıq jumıs rejelerin qáliplestiriw jáne balanıń bilim alıwı hám jámiyetke integraciyalasıwına qaratılǵan ilajlar názerde tutılǵan.
Sonday-aq, balalardıń huqıqıy qorǵalıwın támiyinlew maqsetinde processuallıq háreketlerde balalardıń máplerin kepillew, balalar menen isleytuǵın qánigelerdi arnawlı tayarlıqtan ótkeriw hám balalarǵa baylanıslı jumıslarda uyımlararalıq birge islesiwdi kúsheytiw wazıypaları belgilengen.
Strategiya sheńberinde sociallıq qáwipli balalardı bilimlendiriw menen qamtıp alıw imkaniyatların keńeytiw, alternativ jaylastırıw mexanizmlerin rawajlandırıw, kásipke baǵdarlaw hám balalardı jámiyetke beyimlestiriwge qaratılǵan ilajlar názerde tutılǵan.
Shańaraqlar menen islesiw baǵdarında bolsa balaǵa qarata zorlıq qáwpin azaytıw, ata-analardı qollap-quwatlaw, psixologiyalıq hám sociallıq xızmetlerdi shólkemlestiriw boyınsha ayrıqsha wazıypalar belgilengen.
Sonıń menen birge, balalardı sociallıq qorǵaw tarawındaǵı maǵlıwmatlardı birden-bir elektron platforma tiykarında júrgiziw, balalarǵa qarata zorlıq jaǵdayları boyınsha birden-bir esap hám monitoring sistemasın engiziw strategiyanıń áhmiyetli baǵdarlarınan biri etip belgilengen.
Prezidentimiz bul wazıypalardı ámelge asırıwda sociallıq qorǵaw hám balalardı qorǵaw tarawlarında sistemalı qatnas jasawdı támiyinlew, názerde tutılǵan ilajlardıń orınlanıwın turaqlı qadaǵalawda tutıw boyınsha juwapkerlerge tiyisli tapsırmalar berdi.

ÓzA