Ózbekstan Tutınıwshılardıń huqıqların qorǵaw jámiyetleri Federaciyası baslıǵınıń tiyisli buyrıǵına tiykarlanıp, respublika boylap sociallıq taraw obektleriniń gúzgi-qısqı máwsimge tayarlıq kóriw jaǵdayı boyınsha belgilengen tártipte jámiyetlik qadaǵalaw sheńberinde monitoring ilajları ámelge asırılmaqta.

Bul monitoring dawamında bilimlendiriw, densawlıqtı saqlaw hám basqa da sociallıq áhmiyetke iye mákemelerde bar sharayatlar, ásirese, máwsimde xalıq hám xızmetkerler ushın qolaylı ortalıq jaratıwǵa qaratılǵan ilajlardıń orınlanıwı úyrenilmekte. Bul ilajlardıń tiykarǵı maqseti – anıqlanǵan kemshiliklerdi óz waqtında saplastırıw, belgilengen norma hám talaplardıń tolıq orınlanıwın támiyinlewden ibarat.
Atap aytqanda, Nókis innovaciyalıq texnologiyalar institutı hám Ájiniyaz atındaǵı Nókis mámleketlik pedagogikalıq institutlarında úyreniw jumısları alıp barıldı. Úyreniwler dawamında oqıw bólmelerindegi temperatura, ısıtıw sistemalarınıń islew dárejesi, qazanxanalardıń texnikalıq jaǵdayı hám olardıń sapası, sonday-aq, bilimlendiriw mákemeleri imaratlarınıń basqa da áhmiyetli tárepleri hár tárepleme kózden ótkerildi.
Monitoring procesinde juwapker shaxslarǵa gúzgi-qısqı máwsimge tayarlıqtı jáne de kúsheytiw, bar kemshiliklerdi saplastırıw jáne sanitariyalıq-gigienalıq hám texnika qáwipsizligi talaplarına qatań ámel etiw boyınsha tiyisli túsinikler hám usınıslar berildi. Bunday jámiyetlik qadaǵalaw ilajları keleshekte de dawam ettiriliwi rejelestirilgen bolıp, ol sociallıq taraw obektlerinde xalıqtıń máplerin qorǵaw, olarǵa qolaylı hám qáwipsiz sharayatlardı jaratıwǵa xızmet etedi.

Qaraqalpaqstan xabar agentligi