Prezident Shavkat Mirziyoev puqara hám isbilermenlerdiń konstituciyalıq huqıqların qorǵaw mexanizmlerin jetilistiriw, Konstituciyalıq sudlardıń jumısın sanlastırıw máselelerine baylanıslı prezentaciya menen tanıstı.

Usı jılı óziniń 30 jıllıǵın belgilep atırǵan Konstituciyalıq sud jumısınıń nátiyjeliligin arttırıw boyınsha bir qatar ilajlar orınlandı. Sonıń ishinde, 2021-jılı Konstituciyalıq sud haqqındaǵı nızam jańa redakciyada qabıl etilip, nátiyjeli konstituciyalıq qadaǵalaw sisteması jolǵa qoyıldı.
Sonıń menen birge, Konstituciyalıq sud óz wákilliklerin tolıq ámelge asırıwın támiyinlew búgingi kúnniń áhmiyetli wazıypası bolıp, bul baǵdardaǵı reformalardı jańa basqıshqa alıp shıǵıw talap etilmekte.
Prezentaciyada bul baǵdardaǵı usınıslar kórip shıǵıldı.
Sonıń ishinde, Konstituciyalıq sud tárepinen hár jılı mámlekette konstituciyalıq nızamlılıqtı bekkemlew boyınsha usınıs etiletuǵın usınıslardı ámelge asırıwdıń nátiyjeliligi arttırıladı.
Onda Konstituciyalıq sud tárepinen puqara hám isbilermenlerdiń múrájatların kórip shıǵıw tártip-qaǵıydaları optimallastırıladı, ózi bolarlıqqa taslap qoyıw saplastırıladı.
Sonday-aq, “konstituciyalıq shaǵım” institutınıń nátiyjeliligin arttırıw hám múrájat etiwshilerdiń sud qorǵalıwın támiyinlew maqsetinde sud jumısında qollanılǵan nızam Konstituciyaǵa muwapıq emes dep tabılǵan jaǵdayda tiyisli sud hújjetin qayta kórip shıǵıw tártibin engiziw usınıs etildi.
Prezentaciyada Konstituciyalıq sud jumısın sanlastırıw arqalı xalıqqa qolaylıq jaratıw máseleleri de dodalandı.
Atap aytqanda, Konstituciyalıq sud májilislerinde aralıqtan onlayn tárizde qatnasıw, sud májilislerin internet arqalı translyaciyalap barıw, ministrlikler hám uyımlar arasında elektron málimleme almasıwın jolǵa qoyıw rejelestirilgen.
Konstituciyalıq sudtıń xalıqaralıq maydandaǵı abırayın arttırıw, sırt ellerdiń konstituciyalıq sudları menen birge islesiwdi bekkemlew áhmiyetli ekenligi kórsetip ótildi. Sudtıń Aziya konstituciyalıq sudları associaciyasına basshılıǵı sheńberinde elimizde hám sırt elde bir qatar xalıqaralıq ilajlar ótkeriliwi rejelestirilgen.
Ádil sudlawdı támiyinlewge baylanıslı basqa da máseleler, atap aytqanda, ekonomikalıq hám hákimshilik sudlardı xalıq hám isbilermenlerge jáne de jaqınlastırıw kórip shıǵıldı. Sonıń ishinde, bul sudlarǵa múrájat etiwde eksterritorial sudlawǵa tiyislilikti avtomatlastırılǵan málimleme sisteması arqalı sheshiw baslaması alǵa qoyıldı.
Prezidentimiz usınıslardı qollap-quwatlap, olardı sapalı hám sistemalı ámelge asırıw boyınsha juwapkerlerge tapsırmalar berdi.

ÓzA