Ózbekstan Respublikası Prezidenti Shavkat Mirziyoev Yaponiya Bas ministri Sanae Takaichidiń mirát etiwine bola 18-20-dekabr kúnleri rásmiy sapar menen usı mámlekette boladı.

Sapar baǵdarlamasına muwapıq, Tokio qalasında Yaponiya Imperatorı Naruxito, Bas ministr Sanae Takaichi, Parlament basshıları, húkimet aǵzaları, siyasiy partiyalardıń wákilleri hám jetekshi universitetlerdiń rektorları menen ushırasıwlar hám sóylesiwler ótkeriw rejelestirilgen.
Kún tártibinen Ózbekstan – Yaponiya strategiyalıq sheriklik qatnasıqları hám kóp qırlı birge islesiwin jáne de keńeytiw hám rawajlandırıw máseleleri orın alǵan.
Isbilermenlik baǵdarlaması sheńberinde Yaponiyanıń iri kompaniyaları hám finans institutlarınıń basshılarınıń qatnasıwında ushırasıwlar hám ilajlar ótkeriliwi rejelestirilgen. Sawda-ekonomikalıq birge islesiwdi keńeytiw hám investiciyalıq joybarlardı alǵa qoyıw máseleleri hár tárepleme dodalanadı. Eki tárepleme hújjetlerdiń salmaqlı toplamı qabıl etiliwi kútilmekte.
Ózbekstan Prezidenti, sonday-aq, “Oraylıq Aziya + Yaponiya” qarım-qatnası mámleket basshılarınıń birinshi sammitinde qatnasadı. Ilaj sheńberinde “jasıl” ekonomika hám turaqlı rawajlanıw, óz-ara baylanıslılıq hám regionallıq sheriklikti bekkemlew jáne insan resursların rawajlandırıw sıyaqlı tiykarǵı tarawlarda birge islesiw perspektivaları dodalanadı.
Sammit juwmaqları boyınsha Tokio deklaraciyasın qabıl etiw rejelestirilgen.

ÓzA