Májbúriy orınlaw byurosı Qaraqalpaqstan Respublikası basqarması múrájatlar menen islesiw sektorı tárepinen fizikalıq hám yuridikalıq shaxslardıń múrájatların unamlı sheshiwge ayrıqsha itibar qaratılıp, usı jıldıń ótken dáwirinde kórip shıǵılǵan 8 mıń 386 múrájattıń 3 mıń 800 i unamlı sheshilgen.

Máselen, puqara N.G. burınǵı ómirlik joldası derlik 30 million sum aliment pulların tólemey kiyatırǵanlıǵın bildirip, Ózbekstan Respublikası Prezidentine Isenim telefonı arqalı 2025-jılı 9-sentyabrde múrájat qaldırǵan.
Múrájattı úyreniw dáwirinde, Puqaralıq isleri boyınsha Qońırat rayonlar aralıq sudınıń orınlaw hújjetine tiykarlanıp, múrájat etiwshi N.G.nıń paydasına tárbiyasındaǵı bir perzentiniń támiynatı ushın onıń burınǵı ómirlik joldası M.R.dan aliment óndiriw belgilengenligi, juwapker aliment pulların óz waqtında tólemegenligi aqıbetinde onıń qarızı derlik 30 million sumdı qurawı anıqlanǵan.
Sol sebepli, bul múrájat ayrıqsha qadaǵalawǵa alınıp, júzege kelgen qarızdarlıqtı óndiriwdiń barlıq nızamlı ilajların kóriw kerek ekenligi haqqında Májbúriy orınlaw byurosı Qońırat rayonlıq bólimine kórsetpe berilgen.
Sonıń nátiyjesinde 30 million sum aliment pulları usı jıldıń 11-dekabr kúni óndirilip, pullar múrájat etiwshiniń bank plastik kartasına ótkerip berilgen.

Qaraqalpaqstan xabar agentligi