Prezident Shavkat Mirziyoev 16-dekabr kúni sociallıq-ekonomikalıq reformalar processleri menen tanısıw hám keleshektegi wazıypalardı belsendilerdiń qatnasıwında belgilep alıw ushın Yunusabad rayonına bardı.

Mámleketimiz basshısı dáslep Tashkent qalası Yunusabad rayonında qurılǵan iri quwatlılıqtaǵı kogeneraciya stanciyasınıń jumısı menen tanıstı.
Paytaxtta xalıq hám ekonomika obektlerin qıs máwsiminde ıssılıq energiyası menen turaqlı hám úzliksiz támiyinlew maqsetinde bir waqıttıń ózinde elektr hám ıssılıq islep shıǵaratuǵın bir qatar zamanagóy kogeneraciya qurılmaları iske qosılmaqta.
Yunusabad rayonındaǵı 4-jıllılıq orayı aymaǵında mámleketlik-jeke menshik sheriklik tiykarında qurılǵan, quwatlılıǵı 100 MVt bolǵan bul joybar mine usınday áhmiyetli baslamalardan biri bolıp esaplanadı.
Qıtaydıń “CNTIC” kompaniyası menen birgelikte ámelge asırılǵan joybar 3,5 gektar maydanda jaylastı. Onı qarjılandırıw ushın 65 million dollar tikkeley sırt el investiciyası qaratıldı.
Mámleketimiz basshısı oraydıń jumıs procesi menen tanıstı.
Kogeneraciya obektine Ullı Britaniyanıń “Rolls-Royce” kompaniyasınıń 70 dana gaz-porshen úskeneleri ornatıldı.
Qazanxanalardan tutınıwshılarǵa shekemgi bolǵan ıssılıq támiynatı infrastrukturası rekonstrukciyalandı. Íssılıq magistralları jańalandı. Tarmaqlar izolyaciyalı qubırlar menen almastırıldı. Bul bolsa hár qıylı dárejedegi energiya shıǵınlarınıń aldın alıw imkaniyatın beredi.
Oraydıń iske qosılıwı nátiyjesinde jılına 876 million kilovatt-saat elektr energiyası hám 858 mıń gigakaloriya ıssılıq energiyası islep shıǵarıladı. Sonıń menen birge, jılına 35 million kub metr tábiyǵıy gaz únemlenedi.
Endi paytaxtımızdıń Yunusabad, Almazar, Shayxontohur, Mırza Ulıǵbek hám Yakkasaray rayonlarında jaylasqan jámi 1 mıń 846 obekt turaqlı ıssılıq energiyası menen támiyinlenedi. Olardıń 1 mıń 400 i xalıq shańaraǵı, qalǵan bólegi bolsa sociallıq taraw obektleri bolıp esaplanadı. Sonday-aq, 292 mıń shańaraqqa elektr energiyası turaqlı jetkerip beriledi.
Joybar iske túsiwi menen ıssılıq energiyasın islep shıǵarıw ushın jumsalatuǵın qárejetler 40-45 procentke azayadı. Atmosferaǵa shıǵatuǵın pataslandırıwshı zatlar muǵdarı sezilerli dárejede qısqarıp, aqaba suw taslandıları júzege kelmeydi.
Usı jerdiń ózinde Prezidentimiz gúzgi-qısqı máwsimge tayarlıq boyınsha ámelge asırılǵan jumıslar hám ıssılıq orayların rawajlandırıw, Tashkent ıssılıq elektr stanciyasın modernizaciyalaw, paytaxtta abadanlastırıw jumısların jetilistiriw boyınsha usınıslar, sonday-aq, anomal suwıq sharayatında xızmetke tartılatuǵın kúsh hám qurallardı bólistiriw boyınsha prezentaciyalar menen tanıstı.
Paytaxtta 11 mıń 630 kóp qabatlı turaq jay bar. Olarǵa 358 basqarıw servis kompaniyası xızmet kórsetpekte. Mámleketimiz basshısı olardıń máwsimge qay dárejede tayar ekeni menen qızıqtı.
– Qala sharayatında basqarıw servis kompaniyalarınıń jumısı xalıqtıń turmısı menen tıǵız baylanıslı. Sol sebepli olar saat mexanizmindey anıq, úzliksiz islewi kerek. Bunıń ushın zárúr sharayatlar jaratılmaqta. Endi taraw xızmetkerleriniń dúnyaǵa kózqarası hám qatnası da ózgeriwi kerek. Xalıqtıń halınan xabar alıw, kóp qabatlı turaq jaylardıń jer tólesi hám tóbesin, jollar menen oyın maydanshaların tártipli saqlaw zárúr, – dedi Prezident.
Sonday-aq, energetika, abadanlastırıw, qurılıs hám servis tarmaqlarınıń juwapkerlerine máwsim dawamında sistemalı hám muwapıqlastırılǵan halda islew boyınsha tiyisli tapsırmalar berildi.
Prezident Shavkat Mirziyoev Yunusabad rayonında jaylasqan “Yunusabad galereyası” sawda, xızmet kórsetiw hám biznes orayına bardı.
Eki yarım gektar maydandı iyelegen bul iri komplekste 53 mıń kvadrat metrden aslam sawda hám kommerciyalıq maydanlar shólkemlestirilgen. 14 million dollarlıq sırt el investiciyası esabınan bir qatar sırt el brendleri óz jumısın jolǵa qoyǵan.
Ulıwma etip aytqanda, komplekste 100 den aslam sawda orınları ashılıp, 500 ge shamalas jumıs orınları jaratılǵan. Orayǵa jılına 2,5 millionǵa shekem miyman keliwi kútilmekte.
Joybar bahası 43 million dollar bolǵan bul komplekstiń arxitekturalıq-dizayn sheshimi usı jılı ǴMDA mámleketleri arasında ótkerilgen xalıqaralıq arxitekturalıq tańlawda birinshi orındı iyelegen.
Prezident bul jerde ashılǵan kitap dúkanında baspalardıń wákilleri hám kitapqumar jaslar menen sáwbetlesti.
Kitap sawdasın rawajlandırıw, ulıwma alǵanda kitapqumarlıq mádeniyatın balalıqtan baslap keńnen ǵalaba en jaydırıwdıń áhmiyetli ekenligi, sonday-aq, ilimiy hám kórkem ádebiyatlardı basıp shıǵarıwdı keńeytiw, bul baǵdarda baspalardı qollap-quwatlawǵa qaratılǵan ilajlardı islep shıǵıw zárúr ekenligi atap ótildi.
Paytaxt belsendileri, nuranıylar hám jaslar menen qızǵın sáwbet bolıp ótti.
– Barlıq tarawlarda erisilip atırǵan nátiyjeler, bárinen burın, elimizdegi tınıshlıq hám xalqımızdıń awızbirshiliginiń nátiyjesi bolıp esaplanadı. Paytaxtımız kún sayın abat hám kórkem kóriniske iye bolmaqta. Bunı sırt elden kiyatırǵan miymanlar da ayrıqsha atap ótpekte. Birlikte gáp kóp. Onıń tamırı, bárinen burın, máhállelerimizde. Ádil bahanı da xalıqtıń ózi, usı máhálle beredi. Sonıń ushın adamlardı razı etiwge qaratılǵan jumıslarımızdı eń tómengi buwınnan basladıq, – dedi Prezident.
Orayǵa sapar sheńberinde mámleketimiz basshısına bul jerde jumıs alıp barıp atırǵan “Unicon-Soft” IT kompaniyasınıń jumısı tanıstırıldı.
Mámleketimizde málimleme texnologiyaları tarawında jaratılǵan qolaylı sharayatlar hám jeńillikler nátiyjesinde mámleketlik basqarıwdı sanlastırıw, baylanıs infrastrukturasın jaqsılaw, IT bilimlendiriwin rawajlandırıw sıyaqlı kóplegen baǵdarlarda milliy programmalıq ónim islep shıǵarıwshılardıń qatnasıwı izbe-iz keńeyip barmaqta.
Ózbekstan Respublikası Prezidentiniń “Hákimshilik reformalar sheńberinde sanlı texnologiyalar tarawında mámleketlik basqarıwdı nátiyjeli shólkemlestiriw ilajları haqqında”ǵı pármanına muwapıq taraw, tarmaq hám aymaqlardı sanlı transformaciyalawdıń tiykarǵı baǵdarları belgilengen.
Bul processke Yunusabad rayonında jumıs alıp barıp atırǵan “Unicon-Soft” kompaniyası da múnásip úles qosıp kelmekte. 2017-jılı shólkemlestirilgen kárxana usı kúnge shekem respublika boylap 70 ten aslam programmalıq sistema islep shıqqan hám engizgen.
Kompaniyanıń barlıq aymaqlar hám 208 rayon (qala) larda málimleme sistemaların engiziw hám texnikalıq qollap-quwatlaw boyınsha filialları bar. Olarda 1,5 mıńnan aslam xızmetker jumıs alıp barmaqta, sonnan 80 procentin jaslar quraydı.
Házirgi waqıtta “Unicon-Soft” tárepinen sanlastırıw baǵdarında programmalıq hám texnikalıq qurallar islep shıǵarıwdı jolǵa qoyıw, bajıxana jumısın sanlastırıw, sonday-aq, “Sanlı máhálle” platformasın engiziw rejelestirilgen. Mámleketimiz basshısı kompaniyanıń bul baǵdardaǵı joybarlarınıń prezentaciyası menen tanıstı.
Milliy IT ónimler islep shıǵarıwdı bunnan bılay da rawajlandırıw, jaslardıń jasalma intellekt texnologiyaları tarawındaǵı bilim hám kónlikpelerin arttırıw, mámleketlik uyımlarda sanlastırıw processlerin jedellestiriw boyınsha tiyisli usınıslar berildi.
Sonday-aq, Prezidentimiz Rixsiliy kóshesinde ámelge asırılǵan abadanlastırıw jumısları hám zamanagóy infrastrukturanı kózden ótkerdi.
Kósheniń eki kilometrlik bóleginde injenerlik hám transport infrastrukturası túp-tiykarınan jańalandı. Sonday-aq, 24 saat isleytuǵın sawda, ulıwma awqatlanıw hám kewilashar obektler shólkemlestirildi. Nátiyjede 650 jańa jumıs ornı jaratıldı.
Aymaqta kúnine ortasha 35 mıńǵa shamalas avtotransport quralı háreketlenedi. Sonı esapqa alǵan halda, xalıqtıń qáwipsizligi hám háreketleniw qolaylıǵın támiyinlew ilajları kórildi. Sonıń ishinde, 39 mıń kvadrat metr piyadalar jolları qurıldı. Júzge shamalas videobaqlaw kameraları hám onǵa shamalas qıstawlı shaqırıw túymeleri ornatıldı.
Mámleketimiz basshısı Ózbekstan Respublikası Huqıqtı qorǵaw akademiyasınıń jańa imaratı hám oqıw-ilimiy jumısı menen tanıstı.
Prezident Shavkat Mirziyoevtiń 2022-jıl 28-noyabrdegi “Jınayatlardı tergew tarawında maman kadrlardı tayarlawdıń sapa jaǵınan jańa sistemasın engiziw haqqında”ǵı pármanı sheńberinde Bas prokuratura Akademiyası negizinde Ózbekstan Respublikası Huqıq qorǵaw akademiyası shólkemlestirilgen edi.
Akademiya qısqa waqıt ishinde qánigelesken bilimlendiriw mákemesinen prokuratura hám tergew-sorastırıw uyımları ushın kadrlardı birden-bir qatnas tiykarında tayarlaytuǵın, bilimlendiriwdiń úzliksiz sistemasına iye bolǵan, tolıq qánigelesken joqarı bilimlendiriw hám ilimiy-izertlew mákemesine aylandı.
Akademiyanıń professor-oqıtıwshıları hám basqarıw xızmetkerleriniń quramı prokuratura, huqıq qorǵaw uyımları, ilimiy hám ekspertlik mákemelerinde ámeliy tájiriybege iye maman kadrlar menen tolıqtırıldı.
Ótken dáwirde Akademiyaǵa biriktirilgen aymaqtaǵı infrastruktura izbe-iz keńeytilip, bes qabatlı hákimshilik imarat, zamanagóy asxana, miymanxana hám studentler ushın kovorking maydanı qaytadan qurıldı jáne konferenciya zalı, kitapxana túp-tiykarınan rekonstrukciyalandı.
Bunnan tısqarı, 2 oqıw korpusı hám 2 jataqxana imaratları qayta ońlanıp, bilim alıwshılardı qamtıp alıw imkaniyatı eki esege arttırıldı. Házirgi waqıtta bolsa ashıq hám jabıq sport kompleksleriniń qurılısı dawam etpekte.
Teoriya hám ámeliyattıń úylesimliligin támiyinlew maqsetinde kriminalistika poligonları, sud procesin simulyaciyalaw ushın arnawlı zallar, Gezell aynası menen úskenelengen soraw hám tanıp alıw xanaları, kiberpoligon, “darknet” hám sud-ekspertiza laboratoriyalarınan ibarat jámi 12 arnawlı xana qurıldı.
Akademiyada joqarı bilimlendiriwdiń eki basqıshlı sisteması – bakalavriat hám magistratura jolǵa qoyılǵan. 2023-2024-oqıw jılınan elimizde birinshi márte “Túrli sistema – birden-bir qatnas” principi tiykarında bakalavriattıń “Tergew jumısı” hám “Prokurorlıq jumısı” tálim baǵdarlarında oqıw processleri shólkemlestirildi. Kiberjınayatlarǵa qarsı gúresiwge baǵdarlanǵan “kiberprokuror” hám “kibertergewshi”lerdi tayarlaw ushın kelesi jıldan baslap “Kiberhuqıq” bakalavriat baǵdarı shólkemlestiriledi.
Magistraturada “Tergew jumısı,” “Prokurorlıq jumısı” sonday-aq, milliy bilimlendiriw sistemasında birden-bir bolǵan “Korrupciyaǵa qarsı gúresiw jumısı,” “Insan huqıqlarına baylanıslı xalıqaralıq huqıq” qánigeligi boyınsha kadrlar tayarlaw jolǵa qoyıldı. 2025-2026-oqıw jılınan baslap, “Kiberqáwipsizlikti huqıqıy támiyinlew” qánigeligi boyınsha magistrler tayarlanadı.
Qánigelik arttırıwdıń sapa jaǵınan jańa tártibi engizilip, prokuratura hám tergew uyımları xızmetkerleriniń hár úsh jılda keminde bir márte úzliksiz tájiriybe arttırıw sisteması jolǵa qoyılǵan.
Prokuratura uyımlarınıń basshı kadrların qayta tayarlaw, jańadan qabıl etilgen xızmetkerlerdiń baslanǵısh qánigeligin támiyinlew, wákillikli uyımlardıń sorastırıwshı hám tergewshilerin qayta tayarlaw boyınsha jańa sistema jaratıldı.
Aralıqtan hám aralas kurslar jáne xızmetkerlerdiń mútájliklerine tiykarlanǵan bilimlendiriwdiń elektiv modeli qollanılıp kelinbekte. Bul – hár bir xızmetkerge pútkil xızmet jolı dawamında jeke bilimlendiriw traektoriyası boyınsha óz mamanlıǵın úzliksiz arttırıp barıw imkaniyatın jaratadı.
Portal arqalı aralıqtan hám aralas kurslardı jasalma intellekt texnologiyaları tiykarında engiziw jolǵa qoyıldı. Bunda jasalma intellekt tiykarında jaratılǵan virtual assistent hám haqıyqıy tergew ámeliyatında ushırasatuǵın mashqalalı jaǵdaylardı sáwlelendirgen sanlı simulyaciyalıq videolar keńnen qollanılmaqta.
Xalıqqa biypul huqıqıy másláhát beriw ushın yuridikalıq klinika hám arnawlı elektron platforma jumısı jolǵa qoyılǵan. Bul jumısqa studentler tartılıp, tájiriybeli qánigelerdiń basshılıǵında ámeliy kónlikpelerin qáliplestirmekte.
Bunnan tısqarı, Korrupciyaǵa qarsı gúresiw ilimiy-bilimlendiriw orayı shólkemlestirilgen. Bul baǵdarda magistrlerdi tayarlaw, sonday-aq, ilimiy keńestiń jumısın ilimiy-metodikalıq jaqtan támiyinlew jolǵa qoyıldı.
Kiberjınayatshılıq hám basqa da global qáwip-qáterlerge qarsı gúresiw jáne bul baǵdarda maman qánigelerdi tayarlaw maqsetinde ótken jılı Prezidentimizdiń tiyisli qararları tiykarında Akademiya quramında Sanlı kriminalistika ilimiy-izertlew institutı shólkemlestirildi.
Zamanagóy kiberlaboratoriyada 439 quramalı sanlı izertlew hám ekspertiza ótkerilip, 189 kiberjınayat ashılǵanı áhmiyetli.
Akademiyanıń joybarlaw ofisinde AQSh, Yaponiya, Germaniya, Qubla Koreya, Rossiya, Sloveniya hám Shveciya sıyaqlı mámleketlerden tartılǵan ekspertler menen birgelikte 15 ten aslam joybarlar ámelge asırılmaqta.
Akademiyada 10 qánigelik boyınsha ilimiy dárejeler beriwshi keńes jumıs alıp baradı. Sonnan “Korrupciya mashqalaları” qánigeligi boyınsha ilimiy keńes mámleketimizde birden-bir bolıp esaplanadı. Akademiyanıń ilimiy potencialı úsh jıl ishinde 26 procentten 67 procentke jetkerildi.
Prezidentimiz Akademiyanıń sud procesin simulyaciyalaw ushın arnawlı zalları, soraw hám tanıp alıw jáne basqa da qánigelestirilgen xanaları, málimleme-resurs orayında jaratılǵan zamanagóy sharayatlar menen tanıstı, studentler menen pikirlesti.
Bunnan soń Prezident Shavkat Mirziyoevtiń basshılıǵında Tashkent qalasın sociallıq-ekonomikalıq jaqtan hár tárepleme rawajlandırıw, qala ortalıǵın jaqsılaw hám múnásip jasaw sharayatların jaratıw máseleleri boyınsha májilis bolıp ótti.
Bárinen burın, paytaxtta ámelge asırılǵan jumıslar esap-sanaq etildi. Keyingi jılları qalada úlken ózgerisler júz bergeni atap ótildi.
Ótken toǵız jılda Tashkent qalasınıń ekonomikasına 20 milliard dollardan aslam tikkeley sırt el investiciyası kirgizildi, 5 mıńǵa shamalas iri joybar iske qosıldı. Jan basına tikkeley sırt el investiciyası 2017-jıldaǵı 71 dollardan 2,2 mıń dollarǵa arttı.
Qurılıs jumısları, jańadan qurılǵan sawda-servis hám kewilashar obektler “túngi ekonomika”nı rawajlandırdı. Kúni-túni isleytuǵın sawda hám xızmet kórsetiw obektleriniń sanı 3 mıńnan astı.
Tashkentke 1 mıń zamanagóy elektrobus hám avtobus alıp kelinip, 168 jańa jónelis ashıldı. Qosımsha 33 kilometr metro liniyası hám 21 jańa stanciya qurıldı. Yashnabad, Mirabad, Sergeli, Yangihayot hám Yunusabadtaǵı 1 millionǵa shamalas xalıqqa metro xızmetleri jaqınlastı.
Ulıwma, paytaxt ekonomikası sońǵı toǵız jılda 2,5 esege ósip, usı jılı 27 milliard dollarǵa jetedi. Xalıqtıń jan basına dáramat bolsa 4,4 mıń dollardan 8,6 mıń dollarǵa kóbeydi.
Nátiyjede kámbaǵallıq dárejesi jıl basındaǵı 7,3 procentten 1 procentke, jumıssızlıq bolsa 4,5 procentten 3,5 procentke tómenleydi. Yaǵnıy Tashkent qalasında kámbaǵallıq hám jumıssızlıq tábiyǵıy dárejege túsedi.
Tashkent qalasınıń turaqlı xalqı hár jılı ortasha 100 mıńnan kóbeyip, 2030-jılda 3,5 millionnan artıwı kútilmekte. Sonday-aq, jalpı aymaqlıq ónimdi 52 milliard dollarǵa jetkeriw, jan basına dáramattı derlik 2 esege arttırıw rejelestirilgen.
Bul sheklerge erisiw ushın qala hákimi hám onıń orınbasarları, 12 rayon hákimi tınımsız izleniwi, qalanıń turaq jay fondı, transport, energetika, bilimlendiriw hám medicina, servis infrastrukturaların dúnyanıń zamanagóy megapolisleri úlgisi tiykarında qayta kórip shıǵıwı zárúr ekenligi kórsetip ótildi.
Sonlıqtan, usınday megapolislerde basshı bolǵan qánigelerdi hákimge másláhátshi etip alıp keliw boyınsha usınıs maqullandı. Olardıń kóp jıllıq tájiriybesinen paydalanıp, Tashkent qalasın qarjı, aldınǵı texnologiyalar, mádeniyat hám turizm orayına aylandırıw kerek ekenligi atap ótildi.
Mámleketimiz basshısı ele sheshimin kútip atırǵan máseleler kóp ekenligin atap ótip, jańa baslamalardı alǵa qoydı.
– Bárinen burın, qala xalqın táshwishke salıp atırǵan ekologiya, joqarı dáramatlı jumıs orınların jaratıw hám sapalı basqarıw máselesinde qala juwapkerleriniń qatnasın ózgertiwi zárúr.
– 2026-jıl Tashkent qalası ushın “Tez rawajlanıw hám xalıqtıń dáramatlarınıń ósiwi” jılı boladı. Bul ideyanı júzege shıǵarıw boyınsha úlken baǵdarlama ámelge asırıladı,-dedi Prezidentimiz.
Paytaxt rayonları 3 baǵdarda rawajlandırılıp, 2026-jılı 9 milliard dollar, eki jılda 20 milliard dollar tikkeley sırt el investiciyasın kirgiziw maqseti belgilendi.
Atap aytqanda, Sergeli, Yangihayot, Bektemirde joqarı texnologiyalıq sanaat hám logistika tarawları “ósiw noqatı” boladı. Sonıń ishinde, kelesi jılı Sergelide maydanı 120 mıń kvadrat metr bolǵan 70 million dollarlıq zamanagóy agrologistika hám qoymaxana iske qosıladı.
Yangihayottaǵı “Jańa áwlad” sanaat zonasında elektrotexnika, toqımashılıq, avtomobil qurılısı hám azıq-awqat tarawında 2 milliard dollarlıq joybarlar ámelge asırılmaqta. Bul sanaat zonası Yangihayot hám Bektemirdegi 640 gektar jer esabınan keńeytiledi. Sonıń esabınan ulıwma bahası 3 milliard dollarlıq ekologiyalıq talaplarǵa sáykes hám joqarı texnologiyalıq jańa joybarlardı baslaw tapsırıldı.
Uchtepa, CHilanzar, Yakkasaray, Shayxontohur hám Almazarda xızmetler, kreativ ekonomika, dizayn hám turizm tiykarǵı investiciya baǵdarlarına aylanadı.
Mırza Ulıǵbek, Yunusabad, Mirabad hám Yashnabadta bolsa jasalma intellekt, startap, finanslıq texnologiyalar, qarjı, medicina hám bilimlendiriw tarawında 1 milliard dollarlıq joybarlar ámelge asırıladı.
Usı jılı qaladaǵı 26 kóshe kúni-túni isleytuǵın kóshelerge aylandırıldı. Bul kóshelerde 1 mıń 200 sawda-servis obektin jaylastırıw esabınan 5 mıń xalıq dáramatlı boldı. Kelesi jılı jáne 18 usınday kósheni shólkemlestiriw wazıypası qoyıldı.
Búgingi kúnde paytaxtta 75 mektep hám sonsha baqsha, 23 sport obektlerine talap bar.
Rayon hákimleri ózleri qarjı tartıp, hár jılı 1 mektep, baqsha hám sport obektin quratuǵını, qalǵan 15 mektep hám baqsha jáne 11 sport obekti investiciya baǵdarlaması sheńberinde qurıp beriletuǵını belgilendi.
Usı jıldan Tashkent qalasınıń hár bir rayonında birewden mektepte bilimlendiriwdiń sapasın arttırıw boyınsha “Tashkent tájiriybesi” baslandı. Yaǵnıy 7-11-klastaǵı 1,5 mıń oqıwshı saylap alınıp, olardı MT, medicina, biznes, injenerlik sıyaqlı baǵdarlarda oqıtıw jolǵa qoyıldı. Oqıwshılardıń pánlerdi ózlestiriwine qarap, muǵallimlerine 20 million sumǵa shekem aylıq miynet haqı tólenbekte.
Bul tájiriybeni keńeytip, bunday mekteplerdiń sanın kelesi jılı 24, 2027-jılı bolsa 33 ke jetkeriw wazıypası qoyıldı.
Endi iri megapolisler sıyaqlı paytaxtımızda da transport sistemasın birden-bir kózqaras tiykarında basqaratuǵın oraydıń jumısı jolǵa qoyıladı. Bul oray hár bir kóshe, hár bir kesilispede transport hám piyadalar aǵımın jasalma intellekt járdeminde tallap, tıǵılıs hám jol transport hádiysesiniń aldın alıw menen shuǵıllanadı.
Kelesi jılı paytaxtqa kiriwdegi 2 qadaǵalaw postı qala sırtına kóshedi, úshewi rekonstrukciyalanadı. Bul jerlerde keminde 3,5 mıń júk hám 5,5 mıń jeńil avtomobil ushın stoyankalar jáne xalıq ushın kempingler qurıladı.
Tiykarǵısı, bul noqatlarǵa jámiyetlik transport tarmaǵı baylanısadı. Paytaxtqa keletuǵın miymanlar avtomobilin usı jerde qaldırıp, tez hám qáwipsiz jámiyetlik transportta háreketleniwi múmkin boladı.
Qala hákimligine kelesi jılı birden-bir basqarıw sistemasına iye svetoforlar menen úskenelengen 100 “aqıllı” kesilispeni jolǵa qoyıw, isbilermenler menen birge 30 mıń avtomobil turıw ornın qurıp, 300 bándirgini rekonstrukciyalaw, 40 kilometr piyada hám 20 kilometr velosiped jolların qurıw, 100 kilometr joldı ońlap, Yunusabad hám Yashnabadta jol ótkelin hám tunnel qurıw tapsırıldı. Kelesi jılı 200 elektrobus alıp keliw wazıypası qoyıldı.
Dúnyanıń iri qalaları sıyaqlı paytaxtımızda da ekologiya máselesiniń áhmiyetliligi artpaqta.
Paytaxtımızdıń 4 bóleginde jasalma kól hám basseynler qurıw joybarların tayarlap, jumıslardı baslaw tapsırıldı. 1-iyunǵa shekem hár bir rayonda 5 kilometrlik 3 den sayalı kósheler paydalanıwǵa tapsırıladı. Hár 10 máhálle ushın 1 jasıl baǵ jaratıw boyınsha óz aldına baǵdarlama baslanadı.
2026-jılı qalada 18,5 kilometr kanal jaǵalıqları bekkemlenedi. Bul jerlerde de jasıl aymaqlar hám seyil etiw orınların shólkemlestiriwdi házirden oylaw zárúr ekenligi atap ótildi.
Sonday-aq, Bektemir, Sergeli hám Yangihayottan ótken Shırshıq dáryasınıń 16 kilometr bólegin bekkemlew esabınan qosımsha 800 gektar ashıladı. Bul jerlerde de 200 gektarda “jasıl belbew,” 250 gektarda ishki jollar, seyil etiw orınları, piyadalar hám velosiped jolları qurılıwı kerek ekenligi kórsetip ótildi.
Qala drenaj sistemasınıń master-rejesi islep shıǵılıp, kelesi jıldan qurılıs jumıslarınıń baslanatuǵını járiyalandı. Baǵdarlama sheńberinde 150 kilometr jabıq drenaj sistemasın qurıw, 197 kilometr kanal hám kollektorlardı ońlaw, 63 kilometr jańa kanallar qurıp, qalada salqın mikroklimat jaratıw rejelestirilgen.
Jawın suwın jıynawshı 17 imarat qurıladı. Bul suwlar terek hám jasıl aymaqlardı suwǵarıwǵa jumsaladı.
Paytaxttıń barlıq kommunallıq shólkemleri hám ayrıqsha xızmetler kúni-túni jumıs islewge ótip, avariyalıq jaǵdaylardıń aldın alıw hám tez saplastırıw menen shuǵıllanıwı, jámiyetlik qáwipsizlikti támiyinlew jumısların kúsheytiw boyınsha tapsırmalar berildi.
Paytaxt – mámlekettiń siyasiy, hákimshilik, ekonomikalıq hám mádeniy orayı. Paytaxttı basqarıw, rawajlandırıw hám qorǵaw boyınsha ózine tán kózqaraslar bolıwı kerek, – dedi Prezidentimiz.
Usı múnásibet penen Tashkent qalalıq keńesine arttırıp orınlanǵan dáramattıń jergilikli byudjetke qaytarılatuǵın bóleginen 20 procentin rayonlarǵa bólistiriw wákilligin beriw, Tashkent qalası hám rayon hákimlerine jergilikli keńesler menen kelisken halda bos qarjılardı depozitke qoyıwǵa ruqsat beriw usınıs etildi.
Tashkent qalası jumısınıń huqıqıy, ekonomikalıq hám shólkemlestiriwshilik tiykarların belgileytuǵın “Ózbekstan Respublikası paytaxtınıń statusı haqqında”ǵı nızamdı qabıl etiw waqtı kelgeni atap ótildi.
“Máhálle jetiligi”niń nátiyjesin arttırıwda paytaxt jetekshi bolıwı kerek ekenligi atap ótildi.
2026-jıldan Tashkent qalasında jańa sistema engiziledi – “máhálle jetiligi” tolıq qala hákimliginiń ıqtıyarına ótedi.
– “Jetilik” esabatlar menen emes, al adamlardıń awırın jeńil etiw menen shuǵıllanıwı zárúr, – dedi Prezidentimiz.
Májilis dawamında paytaxt hám onıń rayonları hákimleriniń esabatları tıńlandı, isbilermenler menen sóylesti.

ÓzA