Muzıka, ayaq oyın hám mádeniy miyras – Ózbekstan hám Ázerbayjan tileklesliginiń tımsalı boldı. Eki tuwısqan xalıq arasındaǵı doslıq hám birge islesiw qatnasıqların jáne de bekkemlew maqsetinde Baku qalasında keń kólemli joybar – Ózbekstan mádeniyatı kúnleriniń ashılıwı bolıp ótti.

Bul jıyın Ózbekstan hám Ázerbayjan mádeniyat ministrlikleri tárepinen shólkemlestirilgen bolıp, kórkem óner sheberleriniń qatnasıwındaǵı baǵdarlama hám fotokórgizbeni óz ishine aladı.
Ilajdıń saltanatlı ashılıw máresiminde 170 ten aslam delegaciya aǵzaları, sonıń ishinde, Ózbekstan xalıq artistleri, xızmet kórsetken artistler, mámleketlik simfoniyalıq orkestri, maqam ansambli, “Nawrız” ayaq oyın jámáátiniń wákilleri qatnaspaqta.
– Bakude bizdi jıllı kútip aldı hám oylayman, baǵdarlamamız ázerbayjanlılarǵa unaydı, – dedi Ózbekstan mádeniyat ministriniń birinshi orınbasarı Bahodir Ahmedov ÓzAnıń xabarshısına bergen intervyuinde. – Bunday ilajlar xalıqlarımız arasındaǵı doslıq hám mádeniy baylanıslardı bekkemlewde ayrıqsha orın tutadı.
Mámleketlerimiz jetekshileri arasındaǵı qatnasıqlar kóplegen tarawlar, sonıń ishinde, mádeniyat tarawına da unamlı tásir kórsetip atırǵanın atap ótiw kerek. Hár jılı Ázerbayjanda Ózbekstan mádeniyatı kúnleri, Ózbekstanda bolsa Ázerbayjan mádeniyatı kúnleri bolıp ótpekte.
– Bul mádeniy ilaj kóplegen miymanlardıń itibarın tartatuǵınına isenemiz, – deydi Ázerbayjan mádeniyat ministriniń orınbasarı Farid Jafarov. – Eki úlke birdey mádeniy miyrasımız hám qádiriyatlarımızdı jedel hám joqarı dárejede úgit-násiyatlap atırǵanın atap ótiw kerek.
Ózbekstandaǵı Geydar Aliev atındaǵı Ázerbayjan mádeniyat orayınıń direktorı Akif Marifliniń sózlerine bola, eki mámleket arasındaǵı qatnasıqlar xalıq diplomatiyasına tiykarlanǵan bolıp, ol adamlardı birlestiretuǵın ózine tán kópir wazıypasın atqarmaqta.
– Biz Nizamiy Genjewiy hám Áliysher Nawayı ruwxındaǵı klassikalıq ádebiyat dástúrleri tiykarında qáliplesken ullı civilizaciya tiykarın salıwshılarımız, – dedi ol. – Quwanıshlı tárepi, búgin prezidentler Ilham Aliev hám Shavkat Mirziyoevtiń is-háreketleri menen mámleketler arasındaǵı qatnasıqlar strategiyalıq sheriklik dárejesine kóterildi. Mádeniyat orayımızdıń wazıypası – bul mádeniy miyrastı jetilistirip, Ózbekstanda Ázerbayjan mádeniyatı, Ázerbayjanda ózbek mádeniyatın úgit-násiyatlawdan ibarat.
Bul ilajlar sheńberinde eki tuwısqan úlkeniń mádeniyat boyınsha birgeliktegi komissiyasınıń birinshi májilisi, Ázerbayjandaǵı mádeniy mákemelerge sapar etiw hám Túrk mádeniyatı hám miyrası qorınıń basshısı menen ushırasıw ótkeriliwi de rejelestirilgen. Ánjumannıń jabılıw máresimi Fizuliy qalasındaǵı Mırza Ulıǵbek atındaǵı ulıwma bilim beriw mektebinde ótkeriledi.

Aziza Alimova, ÓzA