12-14-dekabr kúnleri Vengriya mámleketiniń Budapesht qalasında sporttıń qılıshpazlıq túrinen jáhán kubogi bolıp ótti.

Dúnya júziniń 36 mámleketinen 223 sportshı qatnasqan bul jarısta, Ózbekstan jas óspirimler saylandı komandası qızları sıylı úshinshi orındı jeńip alıwǵa miyasar boldı.

Quwanıshlı tárepi sonda, saylandı komanda quramında Fernanda Xerrera menen birge, respublikamız sportshılarınan Nargiza Jaqsıbaeva hám Ayakóz Jumamuratovalar komandamızdıń jeńisine ózleriniń salmaqlı úlesin qostı.
Atap aytqanda, qızlarımız 1/8 finalda Ullı Britaniyanı 45:30, 1/4 finalda Bolgariyanı 45:44 esabında jeńip shıǵıwǵa miyasar boldı hám Italiya menen Germaniya saylandı komandalarınan soń úshinshi orındı iyeledi.
Qılıshpaz qızlarımızdı hám olardıń ustazların qolǵa kirgizgen bul úlken tabısı menen qutlıqlaymız.

Adilbay Orazov,
Qaraqalpaqstan xabar agentligi sholıwshısı