Ádillik ministrligi tárepinen islep shıǵılǵan usınıslar tiykarında Húkimet qararı menen isbilermenlik jumısına baylanıslı 1 600 den aslam májbúriy talaplar biykar etildi.

Atap ótiliwinshe, bunday keń kólemdegi sheklewlerdi biykarlaw birinshi márte ámelge asırılmaqta. Atap aytqanda, veterinariya xızmeti qadaǵalawı astındaǵı 1 568 tovar poziciyası boyınsha ónimge muwapıqlıq sertifikatın alıw talabı biykar etildi. Sonday-aq, turizm xızmetlerin kórsetiwde usı jumısqa tán bolmaǵan hám jeke tártiptegi isbilermenler ushın artıqsha sheklewler alıp taslandı.
Bunnan tısqarı, jeke tártiptegi isbilermenler tárepinen importtı ámelge asırıwda tovar bahasına qoyılǵan 5 mıń AQSh dolları muǵdarındaǵı sheklew, turistlerge turaq jaydı 30 kúnge shekem ijaraǵa beriw, sonday-aq, aǵashtan mebel tayarlawǵa baylanıslı ayırım talaplar da biykar etildi.
Nátiyjede isbilermenlerdiń hákimshilik uyımlar menen qatnasıqlarındaǵı artıqsha byurokratiyalıq tosqınlıqlar qısqartılıp, olardıń qárejetleri, waqtı hám resursların únemlewge erisiledi.
Maǵlıwmat ornında, házirgi waqıtta Isbilermenlik tarawındaǵı májbúriy talaplar birden-bir elektron reestrine 36 mıńnan aslam talaplar kirgizilgen bolıp, Ádillik ministrligi tárepinen tarawlar kesiminde bul talaplardı basqıshpa-basqısh qısqartıw hám isbilermenler ushın qosımsha qolaylıqlar jaratıw boyınsha sistemalı jumıslar alıp barılmaqta.

ÓzA