Prezident Shavkat Mirziyoev Ózbekstanǵa import etiletuǵın brend ónimlerine qollanılatuǵın jeńilletilgen bajıxana bajılarınıń dizimin keńeytiwge baylanıslı qararǵa qol qoydı.

Jańa ózgerisler tómendegi baǵdarlarǵa xızmet etedi:
• xalıqaralıq kompaniyalar menen óndiris hám sawda kooperaciyasın kúsheytiw;
• Ózbekstanǵa iri jáhán brendlerin tartıw;
• usaqlap satıw bazarın rawajlandırıw;
• mámlekette shoping-turizm (satıp alıw ushın sayaxat) kólemin arttırıw.
Tómenletilgen bajıxana bajıları tek ǵana tovar brend iyesi menen tikkeley shártnama tiykarında yamasa onıń rásmiy distribyutorı, dileri, sawda wákili yamasa licenziat arqalı alıp kirilgende ámel etedi.
Bul talap kontrafakt ónimlerdi sheklew hám bazarda sapanı támiyinlewge qaratılǵan.
Jeńilletilgen bajı stavkaları tómendegi tovarlarǵa engizildi:
• kofe hám kofe qosılǵan ónimler – 0 procent;
• turmıslıq shamlar – 10 procent;
• plastikalıq, aǵash, metall ıdıs-tabaq hám asxana buyımları – 10 procent;
• sebetler hám oramlı buyımlar – 10 procent;
• qolda toqılǵan hám basqa da gilemler – 10 procent;
• jawlıqlar hám sayaxat kórpeleri – 5 procent;
• asxana hám stol dasturxanları – 10 procent;
• perdeler – 5 procent;
• farfor, keramika hám shiyshe ıdıslar – 10 procent;
• qasıq, vilka, pıshaq hám asxana úskeneleri – 10 procent.
Atap ótiliwinshe, bul qarar jergilikli bazarda sapalı brend ónimleriniń bahasın tómenletedi. Sonday-aq, nızamsız import hám “sayadaǵı bazar”dıń úlesin azaytadı, sawda orayları hám turistlik aymaqlarda jáhán brendleriniń sanı artıwına alıp keledi hám xızmetler tarawında jańa jumıs orınlarınıń jaratılıwına túrtki beredi,- dep málimleme beredi xabar.uz saytı.

Qaraqalpaqstan xabar agentligi