Nókis qalasında Ózbekstan Jurnalistler awqamı Qaraqalpaqstan bóliminiń gezektegi májilisi bolıp ótti.

Onda awqam bóliminiń aǵzaları, belgili jurnalistler, jergilikli ǵalaba xabar qurallarınıń wákilleri qatnastı. Ózbekstan Jurnalistler awqamı Qaraqalpaqstan bóliminiń baslıǵı Dawıt Abibullaev mámleketimizde Prezidentimiz Shavkat Mirziyoev tárepinen ashıq-aydınlıqtı, baspasóz hám sóz erkinligin támiyinlew, Jańa Ózbekstannıń jańa jurnalistikasın jaratıw máselelerine ayrıqsha itibar qaratılıp atırǵanı, tarawǵa baylanıslı nızamshılıq jetilistirilip atırǵanı, jurnalistlerge reformalardı, waqıya-hádiyselerdi qalıs hám ádil sáwlelendiriw sıyaqlı juwapkershilikli wazıypalar júklengenin ayrıqsha atap ótti.
Dáslep ilajda Ózbekstan Jurnalistler awqamı Qaraqalpaqstan bólimi tárepinen 2025-jılı ámelge asırılǵan jumıslar dodalandı.
Atap ótilgenindey, kóp jıllar “Erkin Qaraqalpaqstan” gazetasında miynet etken E.Ermanov, Ó.Ótewliev, J.Ońaybaev, Qaraqalpaqstan teleradiokompaniyasında islegen Q.Mádreymov, R.Xámiydova, “Qanlıkól xabarları” gazetasınıń bas redaktorı bolıp islegen K.Tilewov, Qaraqalpaqstan radiosında miynet etip, búgingi kúnde pensiyada bolǵan Q.Shamuratov sıyaqlı bir qatar veteran jurnalist hám redaktorlardıń halınan xabar alınıp, olarǵa awqam atınan sawǵalar tapsırıldı. Jańa jıl bayramı aldınan jáne onnan aslam jurnalistlerdiń halınan xabar alıw rejelestirilgen.
Esap beriw dáwirinde “Shımbay hawazı” gazetasınıń fotokorrespondenti, Ózbekstan Jurnalistler awqamınıń aǵzası O.Pirlenov, “Xojeli haqıyqatı” gazetası bas redaktorınıń orınbasarı F.Ótemuratov, Qaraqalpaqstan telekanalınıń jurnalistleri B.Esmurzaev, A.Óteniyazova, Qaraqalpaq elektr tarmaqlarınıń baspasóz xatkeri Q.Naǵmetov, napaqadaǵı jurnalist Sh.Paxratdinovalar tuwılǵanınıń 60 jıllıǵı, húrmetli jurnalist O.Satbaevtıń 70 jıllıq yubileyleri múnásibeti menen sawǵalar tapsırıldı.
Ózbekstan Jurnalistler awqamı Qaraqalpaqstan bóliminiń baslıǵı D.Abibullaev aymaqtaǵı jergilikli basılımlarda islep atırǵan jurnalistlerdiń jumısın joqarı bahaladı. Olardıń mamanlıǵın arttırıw ushın keleshekte sırt elge jiberiw, dúnya tájiriybesin úyreniw hám ámeliyatqa engiziw boyınsha óz pikirlerin bildirdi.
Bıyıl “Altın qálem” milliy sıylıǵına jergilikli ǵalaba xabar qurallarınıń xızmetkerleri belsene qatnasıp, olardan Qaraqalpaqstan telekanalınıń redaktorı Z.Jabbarbergenova jeńimpaz boldı. Nókis tele orayınıń montaj bólimi aǵa elektromexanigi R.Amangeldieva “Dwstlik” ordeni menen sıylıqlandı. “Eń ullı, eń áziz” tańlawınıń respublikalıq basqıshında telekanal jurnalisti S.Jumanazarova sıylı orındı iyeledi. Qaraqalpaqstan Respublikası Joqarǵı Keńesi hám Ministrler Keńesiniń qollap-quwatlawı menen awqamnıń Qaraqalpaqstan bólimine 40 million sum subsidiya ajıratıldı. Jáne bir jańalıq Prezidenttiń “Jurnalistler jumısın qorǵaw hám qollap-quwatlawda Ózbekstan Jurnalistler awqamınıń rolin arttırıw haqqında”ǵı qarar joybarı islep shıǵılıp, búgingi kúnde dodalanbaqta.
Sonday-aq, májiliste rayonlarda jumıs alıp barıp atırǵan ǵalaba xabar quralları menen tıǵız birge islesiw, olardı qollap-quwatlaw, belsendi jurnalistlerdi hám materiallıq, hám ruwxıy xoshametlew, awqamǵa jańa aǵzalar qabıl etiw boyınsha pikirler bildirildi. Sol kúni jáne 11 jurnalist awqamǵa aǵzalıqqa qabıl etildi. Ózbekstan Jurnalistler awqamı Qaraqalpaqstan bólimi tárepinen 2025-jıl dawamında pidákerlik miyneti, sonday-aq, awqam jumıslarında belsendilik kórsetkeni ushın 5 jurnalist sıylıqlandı.

Qaraqalpaqstan xabar agentligi