Qaraqalpaqstan Respublikası Bajıxana basqarmasınıń Kontrabandaǵa qarsı gúresiw bólimi, “Qaraqalpaqstan” temir jol shegara bajıxana postı hám shegara kúshleri xızmetkerleri tárepinen birgelikte ótkerilgen operativ ilaj nátiyjesinde “Volgagrad-Tashkent” jónelisindegi jolawshı poezdınıń 7-sanlı vagonındaǵı hájetxananıń joqarǵı (ventilyaciya) bólimine tis emlewde paydalanılatuǵın implantlar hám ásbap-úskeneler, usı quramnıń 12-sanlı vagonındaǵı kupesiniń tóbesi, shaxta bólimlerinde jasırılǵan medicinalıq buyımlar bar ekenligi anıqlandı.

Ekspertiza juwmaǵına bola, jámi 3606 dana hár qıylı túrdegi tis emlewde paydalanılatuǵın implantlar hám medicinalıq buyımlardıń bahası 1 milliard 839 million 592 mıń sumǵa teńligi tastıyıqlanıp, bul buyımlarǵa muwapıqlıq sertifikatları rásmiylestirilmegenligi sebepli medicina ámeliyatında qollanılǵanda insan ómirine qáwip tuwdırıwı múmkin ekenligi málim etilgen hám saqlaw, satıw, tasıw hám medicina ámeliyatında qollanıw qadaǵan etilgenligi kórsetilgen.
Házirgi waqıtta bul boyınsha sorastırıw jumısları alıp barılmaqta.

Qaraqalpaqstan xabar agentligi