Vatikannıń Apostollar sarayında Ózbekstannıń Ispaniyadaǵı elshisi Farruh Tursunov Rim Papası Lev XIV ge isenim jarlıqların tapsırdı.

“Dúnya” XAnıń xabar beriwinshe, sáwbetlesiw waqtında elshi Ózbekstan Prezidenti atınan Rim papasına qızǵın sálem hám eń jaqsı tileklerin jetkergen.
Rim papası Lev XIV Ózbekstan Prezidenti hám xalqına tereń húrmet-izzetin bildirdi. Ol Ózbekstan hám Vatikan arasında diplomatiyalıq qatnasıqlar ornatılǵanınan berli ótken 33 jıl dawamında túrli millet hám din wákilleri arasında doslıq hám óz-ara túsinisiwdi bekkemlewge qaratılǵan bekkem birge islesiw potencialı qálipleskenin atap ótti.
Sonday-aq, ol Samarqandtıń Shıǵıs hám Batıs dúnyasına tásir kórsetetuǵın filosofiyalıq hám diniy oy-pikirdiń iri orayı sıpatındaǵı áhmiyetine ayrıqsha itibar qarattı. Ózbekstan dástúriy túrde dinleraralıq tatıwlıq hám keńpeyillik principlerin alǵa qoyıw tárepdarı ekeni, bul baǵdardaǵı xalıqaralıq baslamalardı belsene qollap-quwatlap atırǵanı atap ótildi.
Ushırasıw juwmaǵında Rim papası Lev XIV ózbek xalqınıń gúllep-rawajlanıwı ushın ibadat etetuǵının atap ótip, Ózbekstan hám Vatikan arasındaǵı doslıq hám konstruktivlik birge islesiw jáne de bekkemleniwin tiledi.
Esletip ótemiz, Farruh Tursunov Ózbekstannıń Ispaniyadaǵı elshisi bolıp esaplanadı. 2024-jıl 9-aprel kúni diplomat Ispaniya Patshası Filipp VI ǵa isenim jarlıqların tapsırǵan.
Bunnan tısqarı, diplomat qosımsha tárizde Ózbekstannıń Andorradaǵı elshisi esaplanadı. 2025-jıl 11-mart kúni ol Andorra járdemshi baslıǵı, Franciya Prezidenti Emmanuel Makronga isenim jarlıqların tapsırǵan.

Qaraqalpaqstan xabar agentligi