Paytaxtımızdaǵı “Hilton” miymanxanasında Xalıqaralıq hám regionallıq pán olimpiadaları jeńimpazların sıylıqlawǵa baǵıshlanǵan saltanatlı ilaj bolıp ótti.

Mektepke shekemgi hám mektep bilimlendiriwi ministrligi tárepinen shólkemlestirilgen bul saltanatlı ilajda bilimlendiriw tarawınıń pidayıları, ustazlar, oqıwshı-jaslar qatnastı.
Ózbekstan Respublikası Prezidenti Administraciyası basshısınıń bilimlendiriwdi reformalaw boyınsha orınbasarı Hilola Umarova bilimlendiriwge qaratılıp atırǵan itibar óziniń ámeliy nátiyjelerin kórsetip atırǵanın atap ótti. Oqıwshılarımızdıń bıyıl xalıqaralıq pán olimpiadalarında erisken jetiskenlikleri aldınǵı jıllarǵa salıstırǵanda 14 esege kóp ekeni dıqqatqa ılayıq.
Prezidentimiz Shavkat Mirziyoevtiń baslaması tiykarında bilimlendiriw tarawında alıp barılıp atırǵan jedel jańalanıw processleri mámleketimizdiń rawajlanıwın misli kórilmegen tárizde alǵa ilgeriletiwde tiykarǵı faktor bolmaqta.
2025-jılı Ózbekstan oqıwshıları 29 xalıqaralıq olimpiadada abıray menen qatnasıp, jámi 210 medaldı qolǵa kirgizdi. Bul 40 altın, 78 gúmis, 92 qola medal.
Elimizde pán olimpiadasında oqıwshılardıń qatnasıwına baylanıslı pútkilley jańasha sistema jaratıldı. Bul tek ǵana bilim hám qábilet kórinisi emes, al jumısınıń hám erk-ıqrarınıń, mártliginiń, ustazlarınıń, Watanǵa mehirdiń ámeliy nátiyjesi bolıp esaplanadı.
Usı jılı elimiz oqıwshıları tárepinen pán olimpiadaları tariyxı boyınsha jańa nátiyje atap ótildi. Birlesken Arab Ámirliklerinde ótkerilgen Xalıqaralıq ximiya olimpiadasında 2 altın, Boliviyada ótken Xalıqaralıq informatika olimpiadasında dáslepki gúmis medal menen sıylıqlandı.
Sonday-aq, elimiz oqıwshıları birinshi márte Evropa qızlar matematika olimpiadasına qatnastı hám 3 medaldı qolǵa kirgizdi.
Oqıwshılarımız Tashkent qalasında bolıp ótken Al-Xorezmiy atındaǵı Xalıqaralıq matematika hám informatika olimpiadalarında 50, Ábiw Rayxan Beruniy atındaǵı Xalıqaralıq ximiya olimpiadasında 19 medal menen sıylıqlandı.
Birlesken Arab Ámirlikleri, Avstraliya, Boliviya, Franciya, Iordaniya, Tailand, Ázerbayjan hám basqa da mámleketlerde bolıp ótken abıraylı pán olimpiadalarında ózbekstanlı jaslardıń aǵartıwshılıq potencialı, bilimi jáne bir márte dúnyaǵa kórsetildi.
Mirjahon Muhammadov – paytaxtımızdaǵı Ábiw Áliy ibn Sino atındaǵı qánigelestirilgen mekteptiń pitkeriwshisi. Ol kóplegen pán olimpiadalarında jeńiske erisken. Usı jılı Braziliya hám Birlesken Arab Ámirliklerinde ótkerilgen xalıqaralıq ximiya olimpiadasında altın medalǵa iye boldı. Saltanatlı ilajda Mirjahon 1 milliard sumnan aslam muǵdardaǵı arnawlı vaucher menen sıylıqlandı.
– Xalıqaralıq pán olimpiadasına úsh jıl tayarlandım, – dedi Mirjahon Muhammadov. – Álbette, oqıw dawamında qıyınshılıqlar da bolıwı tábiyǵıy. Biraq olardı jeńiwge jan-tánim menen háreket ettim. Qolǵa kirgizgen materiallıq jetiskenligimdi ózim ústinde islewge, bilimlerge qatań umtılıwǵa investiciya sıpatında jumsamaqshıman.
Xalıqaralıq olimpiadalarda usınday jetiskenliklerdi qolǵa kirgizgen perzentti tárbiyalaw ushın nelerge itibar qaratıw zárúr? Usı soraw menen Mirjahonnıń anasına múrájat ettik.
– Perzentimizdiń bilim alıwı ushın zárúr barlıq sharayatlardı jaratıwǵa háreket ettik, – dedi xalıqaralıq pán olimpiadaları jeńimpazınıń anası Dilnoza Omonova. – Qalaberdi, balanıń ulıwma bos waqtı bolmawına úlken itibar qarattıq. Qábiletli jaslardıń potencialın júzege shıǵarıw hám olardı qollap-quwatlaw baǵdarındaǵı itibarı ushın mámleketimiz basshısına oǵada minnetdarmız.
Saltanatlı ilajda Xalıqaralıq pán olimpiadalarınıń kóplegen jeńimpaz hám sıylı orın iyeleri, olardıń ustazları salmaqlı aqshalay sıylıqlar menen sıylıqlandı.

Nazokat Usmonova, ÓzA
ÓzA xabarshısı