Mámleketimiz basshısınıń 2025-jıl 26-noyabrde “Ózbekstan Respublikasında yuridikalıq bilimlendiriw hám ilimdi bunnan bılay da reformalaw ilajları haqqında”ǵı pármanı qabıl etildi.

Pármannıń orınlanıwın támiyinlew, yuridikalıq bilimlendiriw tarawında ámelge asırılıp atırǵan reformalardıń ámeliy nátiyjeleri menen keń jámiyetshilikti jaqınnan tanıstırıw maqsetinde Tashkent mámleketlik yuridikalıq universitetinde “Huqıqıy bilimlendiriwdegi reformalar – ǵalaba xabar qurallarınıń názerinde” atamasında press-tur shólkemlestirildi.
Ilaj sheńberinde shólkemlestirilgen brifingte Tashkent mámleketlik yuridika universitetiniń rektorı Baxshillo Xwjaev pármannıń mazmun, yuridikalıq bilimlendiriw sistemasın túp-tiykarınan jetilistiriwdegi áhmiyetine toqtap ótti.
Yuridikalıq bilimlendiriw hám ilimdi rawajlandırıwǵa qaratılǵan mámleketlik siyasattıń tiykarǵı baǵdarları, universitet aldında turǵan wazıypalar jáne zamanagóy, xalıqaralıq standartlarǵa sáykes yuridikalıq kadrlar tayarlaw baǵdarında ámelge asırılıp atırǵan jumıslar haqqında maǵlıwmat berildi.
Universitette xalıqaralıq birge islesiw, birgeliktegi bilimlendiriw baǵdarlamaları hám xalıqaralıq reytingler boyınsha izbe-iz jumıslar alıp barılmaqta. Oqıw procesi sanlastırılmaqta.
Qatnasıwshılar registrator ofisiniń jumısı, studentler ushın jaratılǵan qolaylıqlar, universitettegi transformaciya processleri menen tanıstı. Oqıw-metodikalıq basqarma, málimleme-resurs orayı, imtixan xanaları, “Tsul shop”,sport zalı, sud zalı, situaciyalıq oray, yuridikalıq klinika, belgili huqıqtanıwshılar atındaǵı xanalar hám bir qatar kafedralardıń jumısı ilaj qatnasıwshıların biypárwa qaldırmadı.
Processte universitette jaratılǵan zamanagóy infrastruktura, bilimlendiriw procesiniń ashıq-aydınlıǵı hám studentlerge kórsetilip atırǵan xızmetler ámeliy mısallar arqalı kórsetip berildi.
Baspasóz ánjumanında jurnalist hám blogerler óz tásirleri menen ortaqlastı hám ózlerin qızıqtırǵan sorawlarǵa juwap aldı.

ÓzA