Oliy Majlis Senatına elimizge rásmiy sapar menen kelgen Koreya Respublikası Milliy Assambleyasınıń Baslıǵı U Von Sik basshılıǵındaǵı delegaciya keldi.

Senat Baslıǵı Tanzila Norboeva menen ushırasıwda Ózbekstan hám Koreya arasında ekonomikalıq, mádeniy-gumanitarlıq hám bilimlendiriw tarawlarındaǵı strategiyalıq sheriklik qatnasıqların jáne de jedellestiriw, sonıń ishinde, parlamentleraralıq birge islesiwdi rawajlandırıw máseleleri dodalandı. Atap aytqanda, Koreyanıń abıraylı joqarı bilimlendiriw mákemelerinde ózbek tilin úyreniw jolǵa qoyılǵanı ayrıqsha atap ótildi.
Oraylıq Aziya mámleketleri hám Koreya Respublikası parlamentleri basshılarınıń ushırasıwları formatı isenimli sóylesiw maydanına aylanǵanı atap ótildi.
Tashkent qalasında ótkerilip atırǵan gezektegi májilis sheńberinde de ámeliy hám jemisli nátiyjelerge erisiw boyınsha óz-ara pikir alısıldı. 2023-jıl sentyabr ayında Seul qalasında hám 2024-jıl oktyabr ayında Ashxabad qalasında ótkerilgen ushırasıwlar bul formattıń áhmiyetli ekenligin ayqın kórsetkeni atap ótildi.
Barlıq dárejelerde jolǵa qoyılǵan jedel parlamentleraralıq sóylesiw ayrıqsha atap ótilip, usı jılı dawamında Koreya Respublikası Milliy Assambleyasınıń bir qatar komitetleriniń basshıları dárejesindegi delegaciyalar Ózbekstanǵa kelgenligi qanaatlanıwshılıq penen atap ótildi. Sonday-aq, parlament doslıq toparlarınıń jumısı óz-ara sóylesiwdi muwapıqlastırıw hám ámeliy nátiyjelilikti arttırıwda ayrıqsha áhmiyetke iye.
KOICA shólkemi menen birgelikte Ózbekstanda “elektron parlament” sistemasın engiziw joybarınıń ámelge asırılıp atırǵanı joqarı bahalandı. Bul joybar nızam dóretiwshiligi processlerin jetilistiriw hám parlament jumısınıń nátiyjeliligin arttırıwǵa xızmet etedi.
Tárepler parlamentleraralıq birge islesiwdi bunnan bılay da tereńlestiriwge tayar ekenin bildirdi.
Ushırasıw juwmaǵında Koreya Respublikası Milliy Assambleyasınıń Baslıǵı U Von Sik Húrmetli miymanlar kitabında jazıw qaldırdı.

ÓzA