12-15-dekabr kúnleri Túrkiya Respublikasınıń Stambul qalasında «Global Policy & Dialogue» shólkeminiń baslaması menen «Global Change Summit 2025» xalıqaralıq sammiti bolıp ótti. Bul abıraylı ilajda dúnyanıń 50 den aslam mámleketlerden kelgen jas ilimpazlar, izertlewshiler, siyasat hám bilimlendiriw tarawınıń qánigeleri, sonday-aq, puqaralıq jámiyetiniń wákilleri qatnastı.

Bul xalıqaralıq ilajda Berdaq atındaǵı Qaraqalpaq mámleketlik universiteti inglis til bilimi kafedrasınıń professor-oqıtıwshıları M.Kalabaeva, A.Toleubaeva, R.Xabipova, G.Najimova hám B.Shamshetovalar belsene qatnasıp, ilimiy-akademiyalıq tájiriybe almasıw, globallıq mashqalalar boyınsha sóylesiw alıp barıw hám xalıqaralıq birge islesiw baylanısların bekkemlew imkaniyatına iye boldı.
– Sammit baǵdarlaması sheńberinde insan huqıqları, bilimlendiriw hám jámiyet arasındaǵı óz-ara baylanıslılıq, sanlı mákanda dezinformaciya mashqalası, sonday-aq, siyasat hám jámiyetlik máplerdi úylestiriw máselelerine baǵıshlanǵan master-klasslar, interaktiv bayanatlar hám ámeliy vorkshoplar shólkemlestirildi, – deydi ilaj qatnasıwshısı Rivanna Xabipova. – Kafedra oqıtıwshıları usı sessiyalarda qatnasıp, zamanagóy lingvistikalıq qatnaslar hám mádeniyatlararalıq qarım-qatnas máseleleri boyınsha áhmiyetli ilimiy juwmaqlar shıǵardı.
Ilaj dawamında xalıqaralıq ilimiy birge islesiwdi rawajlandırıw, birgeliktegi izertlewler alıp barıw hám bilimlendiriw procesine aldınǵı tájiriybelerdi engiziw máseleleri de dodalandı. Bul bolsa, inglis til bilimi kafedrası jumısın xalıqaralıq bilimlendiriw maydanına integraciyalawda ayrıqsha áhmiyetke iye.
Sammit juwmaǵında barlıq qatnasıwshılarǵa tiyisli sertifikatlar tapsırıldı. Kafedra professor-oqıtıwshılarınıń Stambul qalasında ótkerilgen usı xalıqaralıq sammittegi qatnasıwı milliy bilimlendiriw sistemasın dúnya tájiriybesi menen úylestiriw, ilimiy potencialdı arttırıw hám keleshektegi izertlewler ushın bekkem tiykar jaratıwǵa xızmet etedi.

Qaraqalpaqstan xabar agentligi