Tashkent qalasında Oraylıq Aziya mámleketleri hám Koreya Respublikası parlamentleri basshılarınıń úshinshi májilisi óz jumısın basladı.

Ushırasıwda Koreya Respublikası Milliy Assambleyasınıń Spikeri U Von Sik, Qazaqstan Respublikası parlamenti Májilisiniń baslıǵı Erlan Koshanov, Tájikstan Respublikası Majlisi Oli Majlisi Namoyandagon Baslıǵınıń orınbasarı Aziz Kodir Giyozoda, Qırǵız Respublikasınıń Ózbekstan Respublikasındaǵı Ayrıqsha hám tolıq huqıqlı elshisi Duyshonqul CHotonov qatnaspaqta.
Ózbekstan Respublikası Oliy Majlisi Senatınıń Baslıǵı Tanzila Norboeva jalpı májiliste bul ushırasıw Oraylıq Aziya regionında qáliplesip atırǵan jańa siyasiy dinamika, parlamentleraralıq isenim hám qarım-qatnastı bekkemlewde áhmiyetli orın iyeleytuǵının atap ótti.
Oraylıq Aziya mámleketleri arasında joqarı dárejedegi sóylesiwler sistemalı túrge enip, regionnıń dúnya maydanındaǵı ornı bekkemlenip atırǵanı, parlamentleraralıq birge islesiw bolsa bul processtiń áhmiyetli tiykarı sıpatında qáliplesip atırǵanı atap ótildi.
Jalpı májiliste shıǵıp sóylegen delegaciya basshıları turaqlı dawam etip atırǵan ushırasıwlardıń áhmiyetin atap ótip, bul format Oraylıq Aziya hám Koreya Respublikasın baylanıstıratuǵın áhmiyetli sóylesiw maydanına aylanǵanına itibar qarattı.
Oraylıq Aziya mámleketleri hám Koreya Respublikası parlamentleri basshılarınıń úshinshi májilisi óz jumısın dawam ettirmekte.

N.Abduraimova,
ÓzAnıń xabarshısı