«Aymaqlıq elektr tarmaqları» akcionerlik jámiyetiniń Qaraqalpaqstan filialında alternativ energiya dereklerinen paydalanıwdıń abzallıqların keń jámiyetshilikke túsindiriw maqsetinde ǵalaba xabar quralları wákilleri jurnalist hám hám keńnen úgit-násiyatlawga baǵıshlanǵan ashıq sáwbet hám press-tur shólkemlestirildi.

Onda qatnasqanlar Nókis qalasındaǵı bir qatar shólkemler hám shańaraqlarda bolıp, qayta tikleniwshi energiya dereklerinen paydalanıp atırǵan puqaralar menen sáwbetlesti.
Filialdıń qayta tikleniwshi energiya derekleriniń esabatın júrgiziw bólimi basshıları respublikamızda bul jóneliste ámelge asırılıp atırǵan jumıslar haqqındaǵı maǵlıwmatlar menen tanıstırdı. Atap ótilgenindey, Ózbekstan Respublikası Prezidentiniń «2023-jılda qayta tikleniwshi energiya dereklerin hám energiya únemlewshi texnologiyalardı engiziwdi jedellestiriw is-ilajları haqqında»ǵı PQ-57 sanlı qararı tiykarında «Aymaqlıq elektr tarmaqları» akcionerlik jámiyetiniń Qaraqalpaqstan filialına búgingi kúnge shekem «Soliq» mobil-qosımshası arqalı 13 335 jeke shańaraqlardan arzalar kelip túsken.
– Filialımızǵa kelgen bul arzalar óz waqtında úyrenip shıǵılıp, 11 599 shańaraqtıń 63, 4 MVt quwatlılıqtaǵı quyash panelleri ushın arza hám múrájatlar tolıq qabıllandı, – deydi filialdıń qayta tikleniwshi energiya derekleriniń esabatın júrgiziw bólimi baslıǵı Madiyar Smaylov. – Usı kúnge shekem jeke xojalıqlardan 47,4 mln kVt/saat elektr energiyası tarmaqqa uzatılıp, 30, 8 mlrd sum subsidiya tólep berildi. Sonıń ishinde, quyash panelinen paydalanıp atırǵan bir xojalıq mart-oktyabr aylarında ortasha 400-500 mıń sum, noyabr-fevral aylarında bolsa, ortasha 100-200 mıń sum payda kórmekte.
Al, xojalıq júrgiziwshi subektlerden 2370 si (sociallıq mákemeler, mámleketlik shólkemler hám isbilermenlik subektleri) 37,5 MVt quwatlılıqtaǵı quyash panellerin ornatqan bolsa, olar arqalı tarmaqqa 13, 2 mln kVt/saat elektr energiyası jetkerip berildi hám bul ushın «Aymaqlıq elektr tarmaqları» akcionerlik jámiyetiniń Qaraqalpaqstan aymaqlıq filialı tárepinen 10,6 mlrd sum tólep berildi.
– 2024-jılı ayına ortasha 38-40 mıń kilovatt tok satıp alǵan bolsaq, 2025-jılı 100 kilovattlıq quyash panelin ornatqannan soń, ulıwma tok satıp almaytuǵın boldıq, – deydi «Sladkiy mir Nurali» juwapkershiligi sheklengen jámiyetiniń baslıǵı Risolat Baltaeva. – Bul bolsa, qarjınıń únemlenip, onı basqa túrdegi mútájliklerimiz ushın jumsawǵa múmkinshilik bermekte.
– Usı jılı 5 kilovatlıq quyash panelin qurǵızǵan edik, – deydi Juwazshı mákan puqaralar jıyını turǵını Mamajan Orazbaeva. – Jazı menen tokqa aqsha tólemey, qaytama awısqanın elektrsetke satıp otırdıq. Bul oǵada jaqsı zat eken. Úyimizde ulıwma tok óshpeydi, ásirese, balalarımızǵa jaqsı boldı.
Ilajda jurnalistlerdiń qızıqtırǵan sorawlarına juwaplar berildi.

Adilbay Orazov,
Qaraqalpaqstan xabar agentligi sholıwshısı