Qádirli qaharman ul-qızlarım!
Húrmetli ustaz-trenerler!
Húrmetli ata-analar!
Bárinen burın, bársheńizdi V Jaslar Paraaziya oyınlarında erisilgen úlken tariyxıy jeńis penen qızǵın qutlıqlayman.
Birlesken Arab Ámirlikleriniń Dubay qalasında kontinentimizdiń 35 mámleketinen kelgen 1 mıń 500 den aslam sportshılar arasında bolıp ótken oǵada keskin bellesiwlerde sizler mártlik hám jigerlilik pazıyletlerin kórsetip, jarıslardıń haqıyqıy qaharmanlarına aylandıńız hám Ózbekstan paralimpiya háreketi tariyxında jáne bir jarqın bet ashtıńız.
Bul abıraylı sport ánjumanında sizlerdi kóp milletli pútkil xalqımız qollap-quwatlap, bársheńizge tabıs hám áwmetler tilep turdı.
Mine usınday joqarı isenimdi maqtanısh penen aqlap, 99 altın, 57 gúmis, 41 bronza medal menen ulıwma komandalıq esapta Aziya kontinentinde 1-orındı iyelep, jeńimpazlıq minberine kóterilgenińiz múbárek bolsın!
Turnir dawamında Ózbekstan gimni derlik 100 márte jańlaǵanı sizlerdiń Watanımızdıń dańqın dúnyaǵa jayıwǵa qanday sheksiz úles qosqanıńızdan derek beredi.
Sizler úlken kúsh-ǵayratıńız, bekkem erk-ıqrarıńız hám umtılısıńız benen Aziyanıń milliy sportı jedel rawajlanıp atırǵan Iran, Yaponiya, Tailand, Indoneziya sıyaqlı mámleketleriniń komandaların da artta qaldırıwǵa eristińiz.
Ózbekstan Paraziya oyınları tariyxında bunday rekord nátiyje, bunday ullı jeńis burın hesh qashan bolmaǵan edi. Álbette, sizler elimiz sportında dańqlı tariyx hám dástúrler jaratıp atırǵan jaslar, sheber qánigeler sıpatında joqarı alǵısqa hám xoshametlerge múnásipsiz.
Pútkil xalqımız, janajan Watanımız sizler menen maqtanadı. Sizler Ózbekstan paralimpiya háreketiniń altın áwladı, altın wákillerisiz.
Bunday qaharman jaslarımızǵa dańq bolsın!
Ásirese, para pauerliftingshi ul-qızlarımız Bahriddin Xolbwtaev, Elbek Farhadov, Oyshajan Rajabboeva, Ruxshona Wktamova óz salmaq kategoriyalarında jáhán rekordın, Nurillo Inobiddinov, Ezoza Abdujabborova, Azizbek Perdebaev, Ruxshona Wktamova, Ziyodaxon Boqijonova, Zuhra Ywldasheva, Gulyuz Nematullaeva bolsa Aziya rekordın ornatqanın ayrıqsha atap ótiw kerek.
Jáne bir áhmiyetli tariyxıy nátiyje – sportshı qızlarımız Madina Muxtorova, Faroǵat Muxammadqulova, Mohichexra Ibragimova para jeńil atletikanıń yadro hám nayza ılaqtırıw baǵdarlamaları sheńberindegi mawasasız bellesiwlerde qarsılaslarına ulıwma imkaniyat qaldırmastan, pútkil medallar toplamın Ózbekstanǵa alıp keldi.
Bulardıń barlıǵı – sizlerdiń tınımsız miynetińiz, bekkem erk-ıqrarıńız, talant hám sheberligińiz, qalaberse, elimizde insan qádirin ámelde támiyinlewge qaratılǵan sistemalı jumıslarımızdıń nátiyjesi, desek, áyne haqıyqattı aytqan bolamız.
Sizler erisken úlken jeńis Jańa Ózbekstan jasları qanday úlken sheklerdi iyelewge uqıplı ekenin ámelde jáne bir márte kórsetkeni menen de oǵada áhmiyetli bolıp esaplanadı. Bul jeńis, álbette, mıńlaǵan jaslarımızǵa maqtanısh, umtılıs hám ilham deregi, úlken tájiriybe mektebi bolıp xızmet etedi.
Pursattan paydalanıp, sizlerdi mine usınday bahadır, márt hám palwan perzentler etip tárbiyalaǵan, iygilikli umtılıslarıńızdı bárqulla qollap-quwatlap kiyatırǵan ata-analarıńız, sheber hám jankúyer ustazlarıńızǵa, barlıq ıqlasbentlerińizge shın kewilden minnetdarshılıq bildiremen.
Áziz sportshı ul-qızlarım,
Qádirli ustazlar!
Xabarıńız bar, jaqında mámleketimizde Paralimpiya háreketin bunnan bılay da rawajlandırıw boyınsha arnawlı qarar qabıl ettik.
Bul qarar sizlerdiń keleshektegi jumısıńız ushın qosımsha túrde jańa sharayat hám imkaniyatlar jaratıw, sport álemindegi jetiskenliklerdiń salmaǵın jáne de arttırıwǵa xızmet etetuǵınına isenemen.
Jáne bir áhmiyetli tárepi – sońǵı jıllarda Sociallıq qorǵaw milliy agentligin dúzip, óz aldına Adaptiv sport túrleri associaciyasınıń jumısın jolǵa qoydıq.
Sonday-aq, bul sistemada Sheberlik mektebin hám tarawda qánigeler tayarlaw boyınsha institut shólkemlestirdik.
Nátiyjede adaptiv sport túrlerindegi baǵdarlardıń sanı 89 ǵa jetkerilip, elimiz máhállelerinde usı sport túrleri menen turaqlı shuǵıllanıwshılardıń sanı 45 mıńnan astı.
Elimizde inklyuziv jámiyet qurıw, mayıplıǵı bolǵan shaxslardıń sociallıq beyimlesiwin támiyinlewge qaratılǵan reformalarımız álbette izbe-iz dawam ettiriledi.
Watanımızǵa joqarı mehir hám sadıqlıǵı, bekkem erk-ıqrarı hám mártligi menen millionlaǵan perzentlerimizge órnek bolıp atırǵan sizler sıyaqlı qaharman ul-qızlarımdı Jaslar arasındaǵı Paraaziya oyınlarında qolǵa kirgizgen tariyxıy jeńisińiz benen jáne bir márte shın kewlimnen qutlıqlap, bársheńizge bekkem densawlıq, aldaǵı jumısıńızda úlken áwmet hám tabıslar tileymen.

Shavkat Mirziyoev,
Ózbekstan Respublikası Prezidenti