Araldı Qutqarıw xalıqaralıq qorı Atqarıw Komitetiniń Nókis filialı tárepinen Aralboyı aymaǵında ekologiyalıq turaqlılıqtı támiyinlewge qaratılǵan hár qıylı joybarlar ámelge asırılıp kelinbekte. Jaqında qor jáne bir qayırlı iske qol urıp, jas áwlad qálbinde tábiyatqa mehir, juwapkershilik hám watansuyiwshilik sezimlerin oyatıwshı baslamanı ámelge asırdı.

Jas áwladtı jasıl keleshek jolında birlestiriwdi maqset etken qordıń qarjılandırıwı menen Nókis qalası Aq jaǵıs MPJdaǵı 2-sanlı ulıwma bilim beriw mektebiniń átirapında «Mektep baǵı» jaratıldı. Bul baǵ – jas áwlad ushın ruwxıy hám ekologiyalıq tárbiyanıń jańa orayına aylanıwı menen birge, mektep oqıwshılarınıń ana jerge mehirin oyatıw, olardı jasıl ortalıq penen jaqınnan tanıstırıw, ekologiyalıq mádeniyattı tereń ańlaw imkaniyatın jaratıwǵa xızmet etiwi menen áhmiyetli, álbette.
Mektep baǵınıń jaratılıwı menen Araldı Qutkarıw xalıqaralıq qorı Atqarıw komitetiniń Nókis filialı, Mektep hám mektepke shekemgi bilimlendiriw ministrligi tárepinen ekologiyalıq akciya shólkemlestirildi.
Akciya sheńberinde dáslep mekteptiń átirapı abadanlastırıldı. Baǵ araların suwǵarıw ushın jer astı qudıqları qazılıp, nasos ornatıldı. Miyweli hám sayamanlı 200 túp shiye, qáreli, alma sıyaqlı terek nálleri otırǵızıldı. Baǵdı suwǵarıwda jer astı suwlarınan nátiyjeli paydalanıw maqsetinde zamanagóy quyash paneli qurıp berildi. Bul arqalı oqıwshılar energiyanı hám suw resursların únemlewdi ańlap jetedi.
Joybardıń maqseti – mektep átirapın kóklemzarlastırıw menen birge, jaslardıń ekologiyalıq bilimin jetilistiriw, keleshek áwladtıń qorshaǵan ortalıqqa bolǵan qatnasın hám juwapkershiligin kúsheytiwden ibarat.
– Mektep baǵında oqıwshılar tárepinen otırǵızılǵan hár bir nálde tábiyatqa mehir, insanǵa itibar hám keleshekke úmit jámlendi. Bul baǵda egilgen hár bir nál, quyashtan quwat alǵan hár bir tamshı suw oqıwshılar qálbinde tábiyatqa mehirdi kúsheytedi, – deydi mektep direktorı B.Yusupova. – Araldı qutqarıw xalıqaralıq qorı Atqarıw komiteti Nókis filialınıń bul baslaması mektep jámáátine úlken juwapkershilik júkleydi. Aldın stadion ornı bolǵan bul jerdiń jaǵdayı biraz tómen edi. Endi mektep átirapı pútkilley basqasha kóriniske iye boldı. Insan qolı hám jaqsı niyeti menen itibarsız qalǵan jer maydanı jasıl baǵqa aylanıp, mektep átirapı keleshekke úmit baylap turǵan jasıl baǵqa aylandı.
Filial tárepinen bul baǵdardaǵı ilajlar orınlarda dawam etpekte.

Á.Jiyemuratov,
Qaraqalpaqstan xabar agentligi