Búgingi kúnde elimizde medicina sistemasın bunnan bılay da rawajlandırıw, tarawdı sanlastırıw, nawqaslar ushın qolaylıq, shıpakerler ushın nátiyjelilik, mámleket ushın bolsa ashıq-aydınlıq hám únemlilikti támiyinlew ushın áhmiyetli ilajlar ámelge asırılmaqta. Nátiyjede Ózbekstan medicina sistemasınıń abırayı artıp, tek ǵana Oraylıq Aziyada emes, al dúnyaǵa belgili bolmaqta.

Atap aytqanda, Milliy statistika komitetiniń maǵlıwmatlarına bola, usı jıldıń yanvar-oktyabr aylarında jámi 75 mıń 666 sırt el puqaraları emleniw maqsetinde Ózbekstanǵa kelgen.
Sonıń ishinde, Tájikstannan 53 mıń 45 adam, Qırǵızstannan 13 mıń 38 adam, Qazaqstannan 6 mıń 979 adam, Rossiyadan 1 mıń 709 adam, Awǵanstannan 533 adam, Túrkmenstannan 215 adam, Túrkiyadan 43 adam, AQShtan 15 adam, Qıtaydan 14 adam, Ázerbayjannan 10 adam hám basqa da mámleketlerden 65 puqara elimizge emleniw ushın kelgen.
Medicinalıq shólkemlerdi licenziyalaw hám akkreditaciyalaw orayınıń maǵlıwmatlarına bola, 2025-jıldıń noyabr ayında Ózbekstanda 124 jańa medicinalıq klinika ashıldı.
Eń kóp jańa klinikalar paytaxtımızda, Tashkent, Ándijan, Qashqadárya hám Ferǵana wálayatlarında ashıldı.
Házirgi waqıtta Ózbekstanda shama menen 9000 mámleketlik emes medicina mákemesi jumıs alıp barmaqta. Bul bolsa mámleketimizde jeke menshik medicina sektorınıń rawajlanıw basqıshı nátiyjeli ótip atırǵanın bildiredi.

Gulnoza Boboeva, ÓzA