2025-jıl 14-dekabr kúni Shomanay rayonı diyqan bazarında rayon xalqınıń tiykarǵı túrdegi azıq-awqat ónimlerine bolǵan talabın qanaatlandırıw hám bahalardıń turaqlılıǵın támiyinlew maqsetinde arzanlastırılǵan azıq-awqat ónimleri sawda yarmarkası shólkemlestirildi.

– Hár jılı Jańa jıl bayramı aldınan shólkemlestiriletuǵın bunday yarmarkalar xalqımızdıń dasturxanın toltırıp, bala-shaǵası menen birge bayramdı kewildegidey ótkeriwi ushın jolǵa qoyılǵan jaqsı ilajlardıń biri, dep esaplayman. Yarmarkada barlıq azıq-awqat ónimleri arzanlastırılıp satılmaqta. Men jańa maydanlanǵan góshtiń (farsh) kilogramın 80 mıń sumnan satıp aldım, endi basqa da úyge kerekli zatlardı satıp almaqshıman. Bunday ilajlardı shólkemlestirip atırǵan basshılarımızdan, bazar adminstraciyasınan minnetdarmız, – deydi qarıydarlardıń biri.
Yarmarkaǵa rayon aymaǵındaǵı fermer xojalıqları hám isbilermenler tárepinen gósh, miywe, palız ónimleri hám basqa da kúndelikli turmısta qollanılatuǵın azıq-awqat ónimleri sawdaǵa shıǵarıldı.
Bunday yarmarkalar Nókis qalası hám rayonlardaǵı barlıq bazarlarda dawam etpekte.

Qaraqalpaqstan xabar agentligi