Qaraqalpaqstan medicina institutında “Oraylıq Aziya – jańa dáwir bosaǵasında” atamasında ilimiy-ámeliy seminar bolıp ótti.

Oǵan Ózbekstan densawlıqtı saqlaw xızmetkerleri kásiplik awqamı Qaraqalpaqstan Respublikası Keńesiniń baslıǵı L.Baybosınova, instituttıń oqıw isleri boyınsha prorektorı M.Kurbanazarov, professor-oqıtıwshılar hám qánigeler qatnastı.
Seminarda búgingi kúni Oraylıq Aziyada qáliplesip atırǵan jańa siyasiy ruwx, qońsı mámleketler arasındaǵı óz-ara isenim, qarım-qatnas hám birge islesiwdiń bekkemleniwi boyınsha pikirlesip, 2017-jıldan berli ótkerilip kiyatırǵan Másláhát ushırasıwları formatı region mámleketleri ushın turaqlı diplomatiyalıq platformaǵa aylanǵanın atap ótti. Bunıń nátiyjesinde shegaralar máselesinde áhmiyetli kelisimler, birgeliktegi joybarlar hám ekonomikalıq integraciya processleri sezilerli dárejede jedellesken.
Sonday-aq, ótkerilgen ilajda regionallıq qáwipsizlik hám turaqlılıq, ekonomikalıq birge islesiw hám transport infrastrukturası, suw, energetika hám ekologiyalıq turaqlılıq hám regionallıq institutlardı kúsheytiw baǵdarlarında alıp barılıp atırǵan jumıslar haqqında keńnen túsinik berildi.
Ilaj juwmaǵında “Jańa Oraylıq Aziya” bul diywal emes – kópir: birge islesiw, isenim hám ulıwmalıq rawajlanıw maydanı ekeni atap ótildi. Regionallıq tilekleslik, óz-ara isenim hám ashıq sóylesiw keleshektegi turaqlılıq hám abadanlıqtıń tiykarǵı kepili bolıp esaplanadı.
Seminar qatnasıwshıları Oraylıq Aziyada bolıp atırǵan tereń integraciya processleri tek ǵana siyasiy hám ekonomikalıq emes, al, sociallıq-gumanitarlıq tarawlar, atap aytqanda, densawlıqtı saqlaw sisteması ushın da keń imkaniyatlar jaratatuǵının atap ótti.

Adilbay Orazov,
Qaraqalpaqstan xabar agentligi sholıwshısı.