Májbúriy orınlaw byurosı hám Ishki isler ministrliginiń Mámleketlik jol háreketi qáwipsizligi xızmeti arasında “Birgeliktegi kórsetpe”ge tiykarlanıp, arnawlı jumısshı toparlar dúzilip, olar tárepinen “AutoCon-SC/M-online” hám “Planshet” úskeneleri járdeminde qala hám rayonlardıń oraylıq kóshelerinde jáne aymaqlıq jol-patrul xızmeti stacionar postlarında reyd ilajları turaqlı túrde ótkerilmekte.

Bul ilajlardı ótkeriwden gózlengen tiykarǵı maqset Jol háreketi qáwipsizligi basqarmaları xızmetkerleri tárepinen jol háreketi qaǵıydaların buzǵanı ushın qollanılǵan hákimshilik járiymalardı óndiriw bolıp esaplanadı. Onda olar tárepinen paydalanılıp atırǵan “AutoCon-SC/M-online” hám Byuro xızmetkerleri tárepinen paydalanılıp atırǵan “Planshet” úskenelerinde jol háreketi qaǵıydaların buzǵan shaxslar hám olarǵa tiyisli avtomashinalar haqqındaǵı maǵlıwmatlar onlayn túrde kórinip, usı úskeneler járdeminde qala hám rayonlar kóshelerinde háreketlenip kiyatırǵan avtotransport qurallarında qarızdarlıq bar yaki joq ekenligi anıqlanadı.
Usınday ilajlar Ellikqala hám Taqıyatasta da ótkerilip atırǵan bolıp, onda qarızdarlıǵı bar avtomashinalar dárhal toqtatılıp, arnawlı járiyma maydanshasına jiberiledi. Qarızdarlıq qaplanbaǵan jaǵdayda óndiriw usı avtomashinalarǵa qaratılıp, avtomashinalardı aukcion sawdalarına shıǵarıp satıwǵa shekem orınlaw háreketleri alıp barıladı. Bunday jaǵdaylardıń aldın alıw maqsetinde avtomashina basqarıwshılarınan jol háreketi qaǵıydalarına qatań ámel etiw soraladı.

Qaraqalpaqstan xabar agentligi.