Túrkiy mámleketler shólkemi (TMSh) energetika ministrleriniń 5-májilisi Túrkiyanıń Stambul qalasında bolıp ótti.

Atap ótiliwinshe, ushırasıwda tárepler energetika tarawındaǵı birge islesiwdiń “TMShnı globallıq geosiyasiy orayǵa aylandırıw procesinde” áhmiyetli ekenligin atap ótken. Sonday-aq, Kaspiy teńizin túrkiy dúnyanı birlestiretuǵın kópir sıpatında kóriw sheńberinde ámelge asırılıp atırǵan “Jasıl energiya koridorı” joybarına ayrıqsha itibar qaratıldı.
Transkaspiy energetika infrastrukturasın rawajlandırıw, sonday-aq, neft hám tábiyǵıy gaz, áhmiyetli minerallar, yadro energiyası hám úshinshi mámleketlerge birgeliktegi energiya investiciyaları sıyaqlı tarawlarda birge islesiwdi keńeytiw máseleleri dodalandı.
Óz-ara sóylesiw waqtında birden-bir energiya kópirin payda etiwshi Oraylıq Aziya, Ázerbayjan hám Túrkiya arasında tájiriybe almasıw, texnologiyalıq birge islesiw hám jańa joybarlardı islep shıǵıw arqalı regionallıq energiya qáwipsizligin bekkemlewge qaratılǵan háreketler atap ótildi.

S.Rahimov, ÓzA