Ózbekstan mámleketlik denetárbiya hám sport universiteti Nókis filialında Prezident Shavkat Mirziyoevtiń “Oraylıq Aziya jańa dáwir bosaǵasında” maqalasınıń áhmiyetin tereń tallawǵa baǵıshlanǵan ushırasıw bolıp ótti.

Ilaj sheńberinde professor-oqıtıwshılar, studentler hám tarawdıń hár qıylı baǵdarlarında jumıs alıp barıp atırǵan qánigeler maqalada alǵa qoyılǵan ideya hám principlerdiń búgingi region turmısı ushın qanday úlken áhmiyetke iye ekenin dodaladı.
Májilisti filial direktorınıń Jaslar máseleleri hám ruwxıy-aǵartıwshılıq isleri boyınsha birinshi orınbasarı Gúlmurat Xojametov ashtı. Ol óziniń shıǵıp sóylegen sózinde Prezidentimizdiń maqalasında belgilep berilgen region elleri arasındaǵı birge islesiwdi bekkemlew, ekonomikalıq hám gumanitarlıq baǵdarlardaǵı integraciya processlerin bunnan bılay da rawajlandırıw, tınıshlıq hám turaqlılıqtı saqlaw sıyaqlı tiykarǵı wazıypalardı atap ótti.
Ilaj qatnasıwshıları tiykarǵı itibardı maqaladaǵı “jańa dáwir bosaǵası” sóziniń mazmunına qarattı. Atap aytqanda, Ózbekstan mádeniyat, sport hám turizm xızmetkerleri kásiplik awqamı Qaraqalpaqstan Respublikası birlesken komitetiniń baslıǵı J.Ayapov regionda bolıp atırǵan geosiyasiy processler, transport-kommunikaciya jollarınıń keńeyiwi hám ekonomikalıq baylanıslardıń jańa basqıshqa kóteriliwi mámleketlerdiń rawajlanıwı ushın úlken imkaniyatlar jaratıp atırǵanın atap ótti.
Sonday-aq, ilajda filialdıń kásiplik awqamı baslıǵı S.Saparniyazov óziniń shıǵıp sóylegen sózinde maqalanıń sociallıq-gumanitarlıq táreplerine itibar qaratıp, ásirese, jaslar tárbiyası, olarda Watansúyiwshilik hám milletleraralıq tatıwlıq ideyaların bekkemlew máseleleri turaqlı áhmiyetke iye ekenin atap ótken bolsa, tariyx páni muǵallimleri R.Aminov hám M.Utebaevlar bolsa, maqalanı regionnıń siyasiy rawajlanıwı hám tariyxıy awızbirshiligin úyreniw kózqarasınan tallap, mámleketler arasındaǵı óz-ara isenim hám awızbirshilik keyingi jıllarda sezilerli dárejede artqanın ilimiy mısallar menen atap ótti.
Dodalawlar dawamında qatnasıwshılar maqalada kóterilgen ideyalar tek ǵana qońsı mámleketler menen qatnasıqlar emes, al mámleketimizde ámelge asırılıp atırǵan modernizaciya processlerine de tikkeley baylanıslı ekenine toqtaldı. Atap aytqanda, bilimlendiriw, sport, mádeniyat hám sociallıq turmıstıń barlıq tarawlarında júz berip atırǵan ózgerisler Oraylıq Aziyanı turaqlı hám ashıq birge islesiw mákanı sıpatında qáliplestiriwge xızmet etpekte.
Ushırasıw juwmaǵında qatnasıwshılar ózlerin qızıqtırǵan sorawlarǵa juwap aldı. Bunday dodalawlar jaslardıń kózqarasın keńeytip, olarda milliy rawajlanıw hám regionallıq birge islesiw processlerine juwapkershilik hám belsendi puqaralıq poziciyasın qáliplestiriwge xızmet etetuǵının kórsetip berdi.

Adilbay Orazov,
Qaraqalpaqstan xabar agentliginiń sholıwshısı