Ózbekstan Respublikası Prezidenti Shavkat Mirziyoev 11-dekabr kúni ámeliy sapar menen Ashxabad qalasına keldi.

Paytaxt aeroportında mámleketimiz basshısın Túrkmenstan Ministrler Kabineti Baslıǵınıń orınbasarı Xojamirat Geldimiradov hám basqa rásmiy shaxslar kútip aldı.
Ózbekstan Prezidenti Ashxabad qalasına kelgen soń, Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedov penen ushırasıw ótkerdi.
Mámleketimiz basshısı Túrkmenstan jetekshisin tariyxıy sáne – turaqlı biytárepliktiń otız jıllıǵı menen qızǵın qutlıqladı hám usı áhmiyetli waqıyaǵa baǵıshlap erteń ótkeriletuǵın xalıqaralıq forum jumısına tabıslar tiledi.
Sóylesiw dawamında Ózbekstan – Túrkmenstan strategiyalıq sheriklik, doslıq hám jaqsı qońsıshılıq qatnasıqların, birinshi gezekte, siyasiy, parlamentleraralıq, sawda-ekonomikalıq, mádeniy hám gumanitarlıq tarawlarda jáne de keńeytiwge ayrıqsha itibar qaratıldı.
Ózbekstan hám Túrkmenstan jetekshileri regionallıq hám xalıqaralıq áhmiyetke iye aktual máselelerdi de kórip shıqtı.
Bunnan soń Ózbekstan Respublikası Prezidenti Shavkat Mirziyoev Túrkmenstan Prezidenti Serdar Berdimuhamedov penen ushırasıw ótkerdi.
Mámleketimiz basshısı Túrkmenstan Prezidenti hám tuwısqan xalqın mámleket biytárepligi járiyalanǵanınıń 30 jıllıǵı, usı áhmiyetli sánege baǵıshlanǵan xalıqaralıq forum joqarı dárejede shólkemlestirilgeni hám 2025-jıl “Xalıqaralıq tınıshlıq hám isenim jılı” dep járiyalanǵanı menen qızǵın qutlıqladı.
Túrkmenstan Prezidentiniń jaqında bolıp ótken Ózbekstanǵa mámleketlik saparı dawamında erisilgen kelisimlerdi ámelge asırıw sheńberinde Ózbekstan – Túrkmenstan strategiyalıq sherikligin bunnan bılay da keńeytiwge ayrıqsha itibar qaratıldı.
Jıl basınan berli tovar almasıw derlik bir milliard dollarǵa jetti. “Shavat-Tashawız” shegara aldı sawda zonası tabıslı jumıs alıp barmaqta. Júk tasıw kólemi 30 procentke arttı, sonıń ishinde, Túrkmenbashı portı arqalı jetkerip beriw jedellesti. Gumanitarlıq hám aymaqlararalıq almasıwlar dawam etpekte.
Húkimetleraralıq komissiya, Isbilermenler keńesi hám Aymaqlar forumınıń bolajaq májilislerinde sawda kólemin esesine arttırıw jáne ekonomika tarmaqları, atap aytqanda, energetika, awıl xojalıǵı, transport hám basqa da tarawlarda birgeliktegi joybarlardı nátiyjeli alǵa qoyıw boyınsha tásirsheń ilajlar kóriw áhmiyetli ekenligi atap ótildi.
Ózbekstan Respublikası Prezidenti Shavkat Mirziyoevtiń Túrkmenstanǵa ámeliy saparı dawam etpekte.

ÓzA